खेड : कोकण रेल्वेमार्गावरून धावणाऱ्या रो-रो सेवेतील एक मालवाहू ट्रक एका बाजूला कलंडल्याचे लाेकाे पायलटच्या लक्षात आले. त्यानंतर ही गाडी खेड रेल्वेस्थानकात थांबवून हा ट्रक पुन्हा बांधण्यात आला.
लाेकाे पायलटच्या जागरूकतेमुळे हा ट्रक खाली पडता-पडता वाचला. अन्यथा माेठा अनर्थ घडला असता. ही घटना शुक्रवार, २ जानेवारी राेजी दुपारी चार वाजण्याच्या दरम्यान घडली.
काेकण रेल्वेमार्गावरून कोलाड येथून मडगावकडे मालवाहू ट्रक घेऊन रो-रो शुक्रवारी जात हाेती. रो-रो सेवेमधील एक मालवाहू ट्रकवरील लोड एका बाजूला सरकल्याचे निदर्शनास आले. त्यामुळे ट्रकही थाेडासा एका बाजूला कलंडला हाेता. हा प्रकार लाेकाे पायलटच्या लक्षात आला. त्यानंतर खबरदारीचा उपाय म्हणून ही रेल्वे तत्काळ थांबवण्यात आली. ट्रक कोसळण्याची शक्यता लक्षात घेऊन रेल्वे प्रशासनाने प्रसंगावधान राखत तत्काळ सुरक्षा उपाययोजना सुरू केल्या.
घटनास्थळी ट्रकमधील माल पुन्हा व्यवस्थित ठेवण्याचे काम उशिरापर्यंत सुरू हाेते. सेफ्टी बेल्ट लावून ट्रक सुरक्षित करण्याची प्रक्रिया राबविण्यात आली. या घटनेमुळे कोकण रेल्वेच्या प्रवासी किंवा इतर रेल्वे वाहतुकीवर कोणताही परिणाम झाला नसल्याची माहिती कोकण रेल्वेच्या सूत्रांकडून देण्यात आली आहे.
सर्व सुरक्षा उपाय पूर्ण झाल्यानंतर आणि मालवाहू ट्रक पूर्णपणे सुरक्षित केल्यानंतर रो-रो सेवा पुढील प्रवासासाठी मार्गस्थ करण्यात येणार असल्याचे रेल्वे प्रशासनाने स्पष्ट केले आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
17:16 03-01-2026
