दापोली/रत्नागिरी : पोटाची खळगी भरण्यासाठी आणि कामाच्या शोधात विदर्भातून कोकणात आलेल्या एका ३५ वर्षीय तरुणाचा दुर्दैवी मृत्यू झाल्याची घटना दापोली (Dapoli) तालुक्यातील विसापूर येथे घडली आहे. धनराज तूळशिराम टेकाम (रा. वणी जनी गावठण, ता. झरी, जि. यवतमाळ) असे मृत तरुणाचे नाव आहे. रस्त्याच्या कडेला झोपलेल्या अवस्थेत असतानाच त्याला हृदयविकाराचा तीव्र झटका (Heart Attack) आल्याने त्याचा मृत्यू झाल्याचे वैद्यकीय अहवालात समोर आले आहे.
नेमकी घटना काय?
पोलिसांनी दिलेल्या माहितीनुसार, मयत धनराज टेकाम आणि त्याचा मित्र राजू तुकाराम रामगडे हे दोघेही यवतमाळ जिल्ह्यातील असून, कामाच्या शोधात दापोली तालुक्यातील विसापूर (Visapur) येथे आले होते. तेथील विसापूर-पाथरीकोड येथील ‘आस्वाद हॉटेल’ जवळ धनराज हा थांबला होता.
रविवार, दि. ४ जानेवारी रोजी सकाळी ८ वाजण्याच्या सुमारास त्याचा मित्र राजू हा तिथे आला असता, त्याला धनराज रस्त्याच्या बाजूला झोपलेला दिसला. राजूने जवळ जाऊन त्याला हाका मारल्या आणि उठवण्याचा प्रयत्न केला, मात्र धनराजकडून कोणताही प्रतिसाद मिळाला नाही. त्याच्या शरीराची काहीच हालचाल होत नसल्याने राजूने आणि स्थानिक ग्रामस्थांनी तात्काळ १०८ रुग्णवाहिका बोलावली.
उपचारापूर्वीच मृत्यू
धनराजला तातडीने दापोली उपजिल्हा रुग्णालयात (Dapoli Sub-District Hospital) दाखल करण्यात आले. मात्र, तिथे डॉक्टरांनी तपासून त्याला मृत घोषित केले. वैद्यकीय अहवालानुसार, त्याचा मृत्यू ‘Acute Myocardial Infarction’ म्हणजेच हृदयविकाराच्या तीव्र झटक्याने झाल्याचे (Cardiorespiratory arrest) स्पष्ट झाले आहे.
पोलिसांत नोंद
याप्रकरणी दापोली पोलीस ठाण्यात आकस्मिक मृत्यूची नोंद (ADR No. 02/2026) करण्यात आली आहे. भारतीय नागरिक सुरक्षा संहिता (BNSS) कलम १९४ अन्वये ही कार्यवाही करण्यात आली असून, पुढील तपास दापोली पोलीस करत आहेत. कामाच्या शोधात आलेल्या एका तरुणाचा असा दुर्दैवी अंत झाल्याने परिसरात हळहळ व्यक्त होत आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
12:06 05-01-2026
