राजापूर : विद्युत खांबावर काम सुरू असताना सुरक्षिततेची काळजी न घेतल्याने आणि सहकाऱ्याचा जीव धोक्यात असल्याची जाणीव असतानाही वीज पुरवठा सुरू केल्याने एका तरुण वायरमनचा दुर्दैवी मृत्यू झाला आहे. राजापूर तालुक्यातील (Rajapur) पेंडखळे येथे ६ जानेवारी रोजी घडलेल्या या घटनेप्रकरणी आता १९ जानेवारी रोजी सहायक ऑपरेटरवर ‘सदोष मनुष्यवधाचा’ (Culpable Homicide) गुन्हा दाखल करण्यात आला आहे. अनिकेत शांताराम परवडी (वय ३२) असे मयत तरुणाचे नाव असून, या घटनेने परिसरात हळहळ व्यक्त होत आहे.
नेमकी घटना काय घडली?
पोलिसांनी दिलेल्या माहितीनुसार, ही घटना ६ जानेवारी २०२६ रोजी सायंकाळी ५:०० वाजण्याच्या सुमारास राजापूर तालुक्यातील पेंडखळे (Pendkhale) येथील प्रताप सुर्वे यांच्या बागेत घडली. मयत अनिकेत परवडी (रा. तिठवली, ता. राजापूर) हे ११ के.व्ही. (11 KV Line) लाईटच्या पोलवर काम करण्यासाठी चढले होते. याच वेळी दिनेश हातणकर हा कर्मचारी दुसऱ्या ठिकाणी काम करत होता. या कामासाठी नाटे फिडरचा (Nate Feeder) वीज पुरवठा बंद करण्यात आला होता.
ऑपरेटरची ती ‘एक’ चूक जीवावर बेतली
या प्रकरणातील आरोपी आणि कंत्राटी ऑपरेटर साहील गुरुनाथ मांजरेकर (वय २८, रा. राजापूर वरचीपेठ) याला कल्पना होती की, एकाच वेळी दोन ठिकाणी काम सुरू आहे. दिनेश हातणकर याचे काम पूर्ण झाल्यावर, साहील याने पेंडखळे येथे अनिकेत परवडी अजूनही पोलवर काम करत आहे, याची खात्री न करताच आणि त्याला शॉक लागू शकतो याची पूर्ण जाणीव (Knowledge) असतानाही मुख्य फिडरचा वीज पुरवठा चालू केला. वीज प्रवाह सुरू होताच खांबावर काम करणाऱ्या अनिकेतला जोरदार शॉक लागला आणि त्यातच त्याचा दुर्दैवी मृत्यू झाला.
पोलिसांत गुन्हा दाखल
सुरुवातीला या प्रकरणी अकस्मात मृत्यूची नोंद करण्यात आली होती. मात्र, तपासांती ऑपरेटरचा हलगर्जीपणा आणि जाणीवपूर्वक केलेले कृत्य निष्पन्न झाल्याने, राजापूर पोलीस ठाण्याचे (Rajapur Police Station) सहा. पोलीस निरीक्षक दीपज्योती पाटील यांच्या फिर्यादीवरून आरोपी साहील मांजरेकर याच्या विरोधात भारतीय न्याय संहिता (BNS 2023) कलम १०५ अन्वये गुन्हा दाखल करण्यात आला आहे.
गुन्हा दाखल दिनांक: १९/०१/२०२६ गुन्हा रजिस्टर नंबर: १३/२०२६
एका चुकीमुळे ३२ वर्षीय अनिकेतला आपला जीव गमवावा लागल्याने राजापूर तालुक्यात संताप आणि दु:ख व्यक्त केले जात आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
14:22 20-01-2026
