◼️ कुर्णे गावातील सुरेश पडये खून प्रकरणाचा उलगडा; संशयित आरोपी मित्र जेरबंद, स्थानिक गुन्हे अन्वेषण शाखेची धडाकेबाज कामगिरी
लांजा/रत्नागिरी : लांजा (Lanja) तालुक्यातील मौजे कुर्णे (Kurne) येथे एका ४५ वर्षीय इसमाचा कुजलेल्या अवस्थेत मृतदेह आढळल्याने खळबळ उडाली होती. हा मृत्यू नैसर्गिक नसून घातपात असल्याचा संशय आल्यानंतर, स्थानिक गुन्हे अन्वेषण शाखेने (LCB Ratnagiri) वेगाने चक्रे फिरवत अवघ्या २४ तासांच्या आत या गुन्ह्याचा छडा लावला आहे. धक्कादायक बाब म्हणजे, मृतकाच्या मित्रानेच क्षुल्लक कारणावरून, केवळ शिवीगाळ केल्याच्या रागातून हा खून केल्याची कबुली दिली आहे. नंदकुमार रविंद्र पांचाळ (वय २५, रा. कुर्णे सुतारवाडी) असे अटक करण्यात आलेल्या संशयित आरोपीचे नाव आहे.
कुजलेल्या अवस्थेत आढळला होता मृतदेह
दिनांक १९ जानेवारी २०२६ रोजी, लांजा तालुक्यातील कुर्णे येथे राहणारे सुरेश रामचंद्र पडये (वय ४५) यांचा मृतदेह त्यांच्याच राहत्या घरात कुजलेल्या अवस्थेत आढळून आला होता. सुरुवातीला याप्रकरणी लांजा पोलीस ठाण्यात (Lanja Police Station) अकस्मात मृत्यू (ADR No. 03/2026) अशी नोंद करण्यात आली होती. मात्र, मृतदेहावरील जखमा आणि घटनास्थळी सांडलेले रक्त पाहून हा नैसर्गिक मृत्यू नसून घातपात असावा, असा संशय पोलिसांना आला.
२४ तासात गुन्ह्याचा पर्दाफाश
पोलीस अधीक्षक श्री. नितीन दत्तात्रय बगाटे (SP Nitin Bagate) आणि अपर पोलीस अधीक्षक श्री. बी.बी. महामुनी यांनी या प्रकरणाचे गांभीर्य ओळखून स्थानिक गुन्हे अन्वेषण शाखेचे पोलीस निरीक्षक श्री. नितीन ढेरे (PI Nitin Dhere) यांना समांतर तपासाचे आदेश दिले. एलसीबीच्या पथकाने घटनास्थळाची पाहणी केली आणि परिसरातून गोपनीय माहिती काढण्यास सुरुवात केली.
यावेळी पोलिसांना महत्वाची माहिती मिळाली की, मयत सुरेश आणि आरोपी नंदकुमार हे मित्र होते. पोलिसांनी संशयित नंदकुमार पांचाळ याला ताब्यात घेऊन खाकीचा हिसका दाखवताच त्याने गुन्ह्याची कबुली दिली.
हत्येचे कारण काय?
आरोपी नंदकुमार याने दिलेल्या कबुलीनुसार, मयत सुरेश पडये याने त्याला शिवीगाळ केली होती. या गोष्टीचा राग मनात धरून नंदकुमारने सुरेशच्या घरात घुसून त्याला जिवे ठार मारले. एका क्षुल्लक रागातून मित्रानेच मित्राचा जीव घेतल्याने परिसरात हळहळ व्यक्त होत आहे.
यांच्यावर गुन्हा दाखल
आरोपीच्या कबुलींनंतर लांजा पोलीस ठाण्यात गुन्हा रजिस्टर नंबर १६/२०२६ अन्वये भारतीय न्याय संहिता (BNS 2023) कलम १०३ (१) प्रमाणे खुनाचा गुन्हा दाखल करण्यात आला आहे. पुढील तपास लांजा पोलीस करत आहेत.
तपास पथक ही धाडसी कारवाई पोलीस निरीक्षक नितीन ढेरे यांच्या मार्गदर्शनाखाली खालील पथकाने केली:
श्रेणी पोलीस उपनिरीक्षक श्री. संदीप ओगले
सहाय्यक पोलीस फौजदार सुभाष भागणे (११८८)
पोलीस हेड कॉन्स्टेबल विजय आंबेकर (९०९)
पोलीस हेड कॉन्स्टेबल दीपराज पाटील (१४०७)
चालक पोलीस कॉन्स्टेबल अतुल कांबळे (२१५)
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
15:09 21-01-2026
