मुंबई: केंद्रीय शिक्षक पात्रता परीक्षा (C-TET) आणि जिल्हा परिषद-पंचायत समिती निवडणुकांचे कर्तव्य एकाच वेळी आल्याने पेचात पडलेल्या शिक्षकांसाठी राज्य निवडणूक आयोगाने मोठा निर्णय घेतला आहे. परीक्षा देणाऱ्या शिक्षकांना निवडणूक कर्तव्यातून सूट देण्यात आली असून, तसे स्पष्ट निर्देश सर्व संबंधित जिल्हाधिकाऱ्यांना देण्यात आले आहेत.
नेमका पेच काय होता?
उपमुख्यमंत्री अजित पवार यांच्या निधनामुळे जाहीर झालेल्या तीन दिवसांच्या शासकीय दुखवट्यानंतर, १२ जिल्हा परिषदा आणि १२५ पंचायत समित्यांच्या मतदानाच्या तारखेत बदल करण्यात आला होता. सुधारित वेळापत्रकानुसार, आता ७ फेब्रुवारी २०२६ रोजी मतदान प्रक्रिया पार पडणार आहे. मात्र, याच दिवशी अनेक शिक्षकांची ‘सी-टीईटी’ परीक्षा असल्याने त्यांना निवडणूक कर्तव्यावर हजर राहणे अशक्य होते.
निवडणूक आयोगाचे निर्देश:
शिक्षकांच्या शैक्षणिक हिताचा विचार करून राज्य निवडणूक आयोगाने हा महत्त्वपूर्ण निर्णय घेतला आहे. आयोगाच्या निर्देशांनुसार:
ज्या शिक्षकांची ७ फेब्रुवारीला सी-टीईटी परीक्षा आहे, त्यांना निवडणूक ड्युटीतून वगळण्यात येईल.
अशा शिक्षकांऐवजी पर्यायी कर्मचाऱ्यांची व्यवस्था करण्याचे आदेश जिल्हाधिकाऱ्यांना दिले आहेत.
यामुळे शिक्षकांना आपली पात्रता परीक्षा विनासायास देता येणार आहे.
