खेड : खेड ते बहिरवली जाणाऱ्या मुख्य रस्त्यावर नांदगाव-माळवाडी (गुलामवाडी) परिसरात एका दुचाकीचा भीषण अपघात झाल्याची घटना घडली आहे. दिनांक १ फेब्रुवारी २०२६ रोजी सायंकाळी ७:४० वाजण्याच्या सुमारास हा अपघात झाला असून, यामध्ये दुचाकी चालक गंभीर जखमी झाला आहे. याप्रकरणी खेड पोलिसांनी संबंधित चालकावर निष्काळजीपणाचा ठपका ठेवत गुन्हा दाखल केला आहे.
मिळालेल्या माहितीनुसार, शाहीद इसाक मुकादम (रा. महाड नाका, ड्रीम पॅराडाईज बिल्डिंग, खेड) हा आपल्या ताब्यातील दुचाकी (क्र. MH 08 AR 2556) घेऊन खेडहून बहिरवलीच्या दिशेने जात होता. प्रवासादरम्यान रस्त्याची विशिष्ट परिस्थिती आणि वळण लक्षात न घेता, त्याने आपले वाहन हयगयीने आणि निष्काळजीपणाने चालवले. वेगावर नियंत्रण न राहिल्यामुळे दुचाकी रस्त्याच्या बाजूला असलेल्या खोलगट भागात जाऊन कोसळली.
या अपघातात शाहीद मुकादम याला किरकोळ व गंभीर स्वरूपाची दुखापत झाली असून, तो स्वतःच्या आणि इतरांच्या जीवास धोका निर्माण होईल अशा पद्धतीने वाहन चालवल्यामुळे या अपघातास कारणीभूत ठरला आहे.
पोलीस तपास आणि गुन्हा नोंद
याप्रकरणी पोलीस हवालदार अलीमोद्दीन बदीयोद्दीन शेख (ब. नं. २००, नेमणूक- खेड पोलीस ठाणे) यांनी फिर्याद दिली आहे. या फिर्यादीवरून खेड पोलीस ठाण्यात आरोपी शाहीद इसाक मुकादम याच्याविरुद्ध भारतीय न्यायसंहिता अधिनियम २०२३ चे कलम २८१, १२५(अ), १२५(ब) तसेच मोटार वाहन कायदा कलम १८४ प्रमाणे गुन्हा रजिस्टर नं. २६/२०२६ नुसार दाखल करण्यात आला आहे. पोलीस या प्रकरणाचा अधिक तपास करत आहेत.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
14:03 04-02-2026
