बारामती: राज्याच्या राजकारणात गेल्या काही दिवसांपासून सुरू असलेल्या मोठ्या घडामोडींनंतर ज्येष्ठ नेते शरद पवार यांनी आज बारामतीतील ‘गोविंदबाग’ येथे पत्रकारांशी संवाद साधला. यावेळी त्यांनी उपमुख्यमंत्री सुनेत्रा पवार यांचा शपथविधी, अजित पवारांचे निधन, विमान अपघात आणि मुख्यमंत्री देवेंद्र फडणवीस यांची विधाने अशा विविध मुद्द्यांवर आपली सडेतोड भूमिका मांडली.
सुनेत्रा पवारांच्या निवडीचे केले स्वागत
सुनेत्रा पवार यांनी उपमुख्यमंत्रीपदाची शपथ घेतल्याबद्दल विचारले असता शरद पवार म्हणाले, “सुनेत्रा पवार यांना ही संधी मिळाली, याचा आम्हाला नक्कीच आनंद आहे.” कौटुंबिक आणि राजकीय संघर्षाच्या पार्श्वभूमीवर पवारांनी व्यक्त केलेला हा आनंद राजकीय वर्तुळात चर्चेचा विषय ठरत आहे.
“स्मारकावर चर्चा करण्याची ही वेळ नाही”
अजित पवार यांच्या स्मारकासाठी विशिष्ट संस्थेच्या जागेची चर्चा सोशल मीडियावर सुरू आहे. यावर भाष्य करताना पवार म्हणाले, “ज्या संस्थेच्या जागेचा उल्लेख केला जात आहे, त्या संस्थेचा अध्यक्ष मी स्वतः आहे. माझ्याकडे अद्याप अशी कोणतीही अधिकृत चर्चा आलेली नाही. सर्व विश्वस्त एकत्र बसून यावर योग्य तो निर्णय घेतील. मात्र, सध्याच्या परिस्थितीत स्मारकावर चर्चा करणे मला योग्य वाटत नाही.”
मुख्यमंत्री देवेंद्र फडणवीस यांना जोरदार प्रत्युत्तर
राष्ट्रवादीच्या विलीनीकरणाबाबत मुख्यमंत्री देवेंद्र फडणवीस यांनी केलेल्या विधानावर शरद पवारांनी कडक शब्दांत टीका केली. पवार म्हणाले, “विलीनीकरणाच्या कथित चर्चेत फडणवीस कुठेच नव्हते. मग माझ्याबद्दल किंवा माझ्या निर्णयांबद्दल उल्लेख करण्याचा त्यांना अधिकार काय? जर अशी काही चर्चा असती तर अजित पवारांनी मला नक्कीच कल्पना दिली असती.”
राजकीय वादापेक्षा सावरण्यावर भर
अजित पवारांच्या निधनानंतर प्रफुल्ल पटेल आणि सुनील तटकरे यांना सोशल मीडियावर ट्रोल केले जात असल्याबाबत त्यांनी भाष्य करण्यास नकार दिला. “आम्ही सध्या मोठ्या संकटातून जात आहोत. एकमेकांना धीर देणे आणि भविष्याचा विचार करणे हे आमचे पहिले कर्तव्य आहे. सध्या कोणत्याही राजकीय निर्णयावर कुणाशीही चर्चा सुरू नाही,” असे त्यांनी स्पष्ट केले.
अर्थसंकल्प आणि लष्करप्रमुखांचे लेखन: पवारांचे महत्त्वाचे मुद्दे
- केंद्रीय अर्थसंकल्प: “नवा कर न लादल्याने सामान्य माणसाला दिलासा मिळाला आहे, ही समाधानाची बाब आहे. मात्र, देशाच्या विकासासाठी ज्या ठोस पावलांची अपेक्षा होती, ती यात दिसत नाहीत,” असे मत पवारांनी व्यक्त केले.
- भारत-अमेरिका करार: अमेरिकेने कृषी निर्यातीबाबत केलेल्या तरतुदी भारतीय शेतकऱ्यांसाठी चिंतेची बाब असल्याचे त्यांनी नमूद केले.
- जनरल मनोज नरवणे यांचे पुस्तक: माजी लष्करप्रमुखांनी लिहिलेल्या मुद्द्यांवर संसदेत चर्चा होणे गरजेचे होते, जेणेकरून देशासमोरील वास्तव चित्र जनतेसमोर आले असते, असेही ते म्हणाले.
- विमान अपघात: अपघाताबाबत अधिकृत माहिती येण्यापूर्वीच शंका उपस्थित करणे चुकीचे असल्याचे त्यांनी पुनरुच्चार केला.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
15:47 05-02-2026
