रत्नागिरी: कोकणची संस्कृती, तिथल्या कला आणि प्रामुख्याने जिभेवर रेंगाळणारी चव जपणे हे आजच्या काळात एक आव्हान बनले आहे. हीच परंपरा जपण्यासाठी रत्नागिरीतील नवनिर्माण शिक्षण संस्थेच्या एस. पी. हेगशेट्ये महाविद्यालयाने एक स्तुत्य उपक्रम हाती घेतला आहे. महाविद्यालयाच्या बी. एस. सी. हॉस्पिटॅलिटी स्टडिज (हॉटेल मॅनेजमेंट) विभागातर्फे रविवार, ०८ फेब्रुवारी २०२६ रोजी “विलुप्त कोकण” या विशेष थीम डिनरचे आयोजन करण्यात आले आहे.
‘नमन चाललं लंडनला’ अन् खास मेजवानी
या सोहळ्याचे मुख्य आकर्षण म्हणजे ‘कोकण नमन कलामंच रत्नागिरी’ प्रस्तुत “नमन चाललं लंडनला” हा संगीमय करमणुकीचा कार्यक्रम. मनोरंजनासोबतच कोकणातील अशा पाककृती ज्या आजच्या धावपळीच्या युगात काळाच्या पडद्याआड जात आहेत, त्या पुन्हा एकदा खवय्यांसमोर मांडल्या जाणार आहेत.
काय असेल खास मेजवानीत?
हॉटेल मॅनेजमेंटच्या विद्यार्थ्यांनी यावर्षी “कोकणातील हरवलेल्या पाककृती” ही संकल्पना निवडली आहे. यामध्ये प्रामुख्याने:
- शाकाहारी पदार्थ: खांतोळी, किसमुर, तोंडांक, हुमण.
- मांसाहारी पदार्थ: कारवारी चिकन सुक्का, बांगडा उपकरी.
हे सर्व पदार्थ पारंपरिक पद्धतीने आणि ऋतुमानानुसार तयार केले जाणार आहेत. विशेष म्हणजे, कार्यक्रमाची संपूर्ण सजावट ही अस्सल कोकणी थाटात असेल, ज्यामुळे उपस्थितांना कोकणच्या मातीचा खरा अनुभव येईल.
विद्यार्थी आणि शिक्षकांची मेहनत
कार्यक्रमाचे नियोजन आणि पाककृतींची जबाबदारी शेफ मेघना शेलार आणि त्यांची टीम सांभाळत आहे. पाहुण्यांना उत्तम फूड सर्व्हिस देण्यासाठी प्रा. अथर्व खांडेकर आणि त्यांची टीम सज्ज आहे. या संपूर्ण सोहळ्याचे नेटके व्यवस्थापन विभाग प्रमुख प्रा. ताराचंद ढोबळे यांच्या मार्गदर्शनाखाली सुरू आहे.
“विलुप्त कोकणी पाककृती या पारंपरिक आणि आजकाल क्वचितच पाहायला मिळतात. आमचे विद्यार्थी ही खाद्यसंस्कृती पुन्हा जिवंत करण्याचा प्रयत्न करत आहेत. तरी रत्नागिरीतील सर्व खवय्यांनी या आगळ्या-वेगळी पर्वणीचा लाभ घ्यावा.” – डॉ. संजय गवाळी, प्राचार्य (एस. पी. हेगशेट्ये महाविद्यालय)
या उपक्रमासाठी नवनिर्माण शिक्षण संस्थेचे चेअरमन मा. अभिजित हेगशेट्ये सर यांनी विद्यार्थ्यांना शुभेच्छा दिल्या असून त्यांचे कौतुक केले आहे.
कार्यक्रमाचा तपशील:
- दिनांक: रविवार, ०८ फेब्रुवारी २०२६
- स्थळ: एस. पी. हेगशेट्ये महाविद्यालय, रत्नागिरी.
- संपर्क (अधिक माहिती व नोंदणीसाठी): * प्रा. ताराचंद ढोबाळे: ७७१९८५१०२५
- कु. रुद्र जाधव: ७८४०९९५३३३
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
14:25 06-02-2026
