पावस (रत्नागिरी): सुसाट वेगाने आणि निष्काळजीपणे दुचाकी चालवून मित्राच्या मृत्यूस कारणीभूत ठरल्याप्रकरणी पुर्णगड सागरी सुरक्षा पोलिस ठाण्यात एका १९ वर्षीय तरुणावर गुन्हा दाखल करण्यात आला आहे. प्रजासत्ताक दिनाच्या दिवशी घडलेल्या या दुर्दैवी घटनेमुळे परिसरात हळहळ व्यक्त होत आहे.
नेमकी घटना काय?
मिळालेल्या माहितीनुसार, संशयित आरोपी संकल्प सुभाष सकपाळ (वय १९, रा. काराजनगी खुर्द, निगडी, ता. जत, जि. सांगली) हा २६ जानेवारी रोजी दुपारी पावणे एकच्या सुमारास आपली दुचाकी (क्रमांक: MH-10 EJ 4770) घेऊन रत्नागिरी-पुर्णगड ते नाटे रस्त्यावरून कशेळी बीचच्या दिशेने जात होता.
त्याच्या दुचाकीवर मागे त्याचा मित्र सुजल संजय घोरपडे हा बसला होता. गावखडी बंडबेवाडी येथील एसटी स्टॉपजवळ (मैल दगड ६१६ जवळ) संकल्पने आपली दुचाकी अत्यंत निष्काळजीपणे चालवल्याने तिचा भीषण अपघात झाला.
गंभीर दुखापतीमुळे मित्राचा अंत
या अपघाताची तीव्रता इतकी मोठी होती की, मागे बसलेला सुजल घोरपडे याला गंभीर दुखापत झाली. त्याला तातडीने उपचारासाठी नेण्यात आले, मात्र उपचारादरम्यान त्याचा मृत्यू झाला. सहलीचा आनंद साजरा करण्यासाठी निघालेल्या मित्रांचा हा प्रवास अशा प्रकारे वेदनादायक ठरेल, अशी कल्पनाही कोणी केली नव्हती.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
14:49 10-02-2026
