दाभोळ: दापोली तालुक्यातील वणौशी तर्फे पंचनदी येथील एक बंद घर फोडून अज्ञात चोरट्याने ७२ हजार रुपयांची रोकड चोरून नेल्याची धक्कादायक घटना समोर आली आहे. फिर्यादी हे मुंबईत राहत असून, त्यांच्या बंद घराचा फायदा घेत चोरट्याने डल्ला मारला आहे. याप्रकरणी दाभोळ पोलीस ठाण्यात अज्ञात चोरट्याविरुद्ध गुन्हा दाखल करण्यात आला आहे.
वणौशी तर्फे पंचनदी येथील भरणेवाडी रोडवर प्रदीप नारायण मयेकर (वय ६८) यांचे ‘दुर्वाकुर निवास’ नावाचे घर आहे. मयेकर हे सध्या मुंबईतील विलेपार्ले येथे वास्तव्यास असल्याने त्यांचे हे घर बंद होते. दिनांक २५ ऑक्टोबर २०२५ ते २५ जानेवारी २०२६ या तीन महिन्यांच्या कालावधीत चोरट्याने या घराच्या खिडकीचे लोखंडी ग्रील उचकटून आत प्रवेश केला. घरात शिरल्यानंतर चोरट्याने कपाटाची चावी मिळवून कपाट उघडले आणि त्यानंतर कपाटातील लॉकर कोणत्यातरी हत्याराने उचकटवून त्यातील पिशवीत ठेवलेली रोख रक्कम चोरून नेली. मयेकर यांनी ११ फेब्रुवारी २०२६ रोजी या चोरीबाबत तक्रार दाखल केली.
चोरीला गेलेला मुद्देमाल
अज्ञात चोरट्याने घरातून एकूण ७२,००० रुपये रोख लंपास केले आहेत. त्यात खालील चलनी नोटांचा समावेश होता:
- ५०० रुपयांच्या १२० नोटा (६०,००० रु.)
- ५० रुपयांच्या १०० नोटा (५,००० रु.)
- २०० रुपयांच्या २० नोटा (४,००० रु.)
- १०० रुपयांच्या २० नोटा (२,००० रु.)
- १० रुपयांच्या १०० नोटा (१,००० रु.)
पोलीस तपास आणि गुन्हा नोंद
याप्रकरणी फिर्यादी प्रदीप मयेकर यांच्या तक्रारीवरून दाभोळ पोलिसांनी अज्ञात चोरट्याविरुद्ध गुन्हा दाखल केला आहे. पोलिसांनी भारतीय न्यायसंहिता (BNS) २०२३ चे कलम ३०५, ३३१(३) आणि ३३१(४) अन्वये गु.र.नं. ०८/२०२६ नुसार गुन्हा नोंदवला आहे. या चोरीच्या घटनेचा अधिक तपास पोलीस करत असून, परिसरातील संशयितांची चौकशी सुरू आहे.
