रत्नागिरी: मुंबईहून रत्नागिरीत आलेल्या एका ५४ वर्षीय व्यक्तीचा जेवणानंतर अचानक प्रकृती बिघडून मृत्यू झाल्याची धक्कादायक घटना समोर आली आहे. महेश विठ्ठल दधरे असे या दुर्दैवी मृताचे नाव असून, ते मुंबईतील भांडुप पश्चिम येथील रहिवासी होते. रत्नागिरीतील मारुती मंदिर परिसरात नातेवाईकांकडे जेवायला गेल्यानंतर ही घटना घडली.
मिळालेल्या माहितीनुसार, मृत महेश दधरे हे सध्या रत्नागिरीतील मारुती मंदिर येथील शहा कॉम्प्लेक्समध्ये वास्तव्यास होते. १० फेब्रुवारी २०२६ रोजी रात्री साडेसातच्या सुमारास त्यांच्या चुलत भावजय सुजाता संतोष वाडेकर यांनी त्यांना जेवणासाठी घरी बोलावले होते. जेवण झाल्यानंतर सर्वांनी मिळून महेश यांनी आणलेले आईस्क्रीम खाल्ले. त्यानंतर गप्पा मारत असताना अचानक महेश यांना शिंका आणि खोकला येऊ लागला. अस्वस्थ वाटू लागल्याने त्यांना अमृतांजन बाम लावण्यास दिला आणि त्यांनी पिण्यासाठी गरम पाणीही घेतले.
मात्र, मध्यरात्री सव्वा बाराच्या सुमारास त्यांची प्रकृती अधिकच खालावली. त्यांना अस्वस्थ वाटू लागल्याने शेजाऱ्यांच्या खाजगी वाहनाने तातडीने डॉ. लोटलीकर यांच्या दवाखान्यात पहाटे अडीच वाजता नेण्यात आले. मात्र, तिथे डॉक्टरांनी त्यांना तपासून मृत घोषित केले आणि शवविच्छेदनासाठी जिल्हा शासकीय रुग्णालयात (सिव्हिल हॉस्पिटल) नेण्यास सांगितले.
घटनेची पार्श्वभूमी
सिव्हिल हॉस्पिटलमध्ये आणल्यानंतर तेथील वैद्यकीय अधिकाऱ्यांनी महेश दधरे यांची तपासणी केली. मात्र, त्यांना रुग्णालयात आणण्यापूर्वीच त्यांचा मृत्यू झाला असल्याचे डॉक्टरांनी स्पष्ट केले. आनंदाने जेवायला आलेल्या व्यक्तीचा असा अचानक मृत्यू झाल्याने वाडेकर आणि दधरे कुटुंबावर शोककळा पसरली आहे. नेमका मृत्यू कशामुळे झाला, हे शवविच्छेदन अहवालानंतरच स्पष्ट होईल.
पोलीस तपास आणि नोंद
या घटनेची माहिती मिळताच रत्नागिरी शहर पोलिसांनी आकस्मिक मृत्यूची नोंद केली आहे. ११ फेब्रुवारी २०२६ रोजी पहाटे ६:३८ वाजता भारतीय नागरिक सुरक्षा संहिता (BNSS) कलम १९४ नुसार आमृ. क्रमांक १६/२०२६ अन्वये या प्रकरणाची नोंद करण्यात आली आहे. पोलीस या घटनेचा अधिक तपास करत आहेत.
