एसटी प्रवाशांसाठी मोठी बातमी! तिकीट सवलतीसाठी आता एनसीएमसी कार्ड अनिवार्य; जाणून घ्या कसे मिळणार कार्ड

मुंबई: राज्य मार्ग परिवहन महामंडळाने (ST) आपल्या प्रवास सुविधेमध्ये मोठा बदल केला आहे. एसटीच्या बस तिकिटांसाठी आणि विविध सवलतींचा लाभ घेण्यासाठी आता ‘नॅशनल कॉमन मोबिलिटी कार्ड’ (NCMC) अनिवार्य करण्यात आले आहे. परिवहन मंत्री तथा एसटी महामंडळाचे अध्यक्ष प्रताप सरनाईक यांनी या महत्त्वाकांक्षी प्रकल्पाची घोषणा केली असून, यामुळे एसटीचा प्रवास आता अधिक ‘डिजिटल’ आणि सुलभ होणार आहे.

या प्रकल्पासाठी महामंडळाने मे. ईबिक्स टेक्नोलॉजिस आणि एनएसडीएल पेमेंट्स बँकेशी करार केला आहे.

सवलतीचा लाभ घेण्यासाठी ‘एनसीएमसी’ का गरजेचे?

एसटीमध्ये विद्यार्थी, दिव्यांग, ज्येष्ठ नागरिक, महिला आणि पुरस्कारार्थी अशा सुमारे ३५ प्रवर्गतील प्रवाशांना विविध सवलती दिल्या जातात. मात्र, अनेकदा खोट्या ओळखपत्रांचा वापर करून सवलत लाटण्याचे प्रकार समोर आले होते. हे टाळण्यासाठी आणि व्यवहारात पारदर्शकता आणण्यासाठी महामंडळाने हे स्मार्ट कार्ड बंधनकारक केले आहे.

या कार्डचे फायदे:

• सवलतींची अचूक नोंद होणार.
• रोखविरहित (Cashless) व्यवहारांना चालना.
• बनावट कागदपत्रांना आळा बसणार.

कार्ड मिळवण्यासाठीची प्रक्रिया आणि शुल्क

प्रवाशांच्या सोयीसाठी बसस्थानकांवरच नोंदणीची प्रक्रिया पार पडणार आहे. ग्रामीण भागातील प्रवाशांना कोणताही त्रास होऊ नये, यासाठी ३००० हून अधिक अधिकृत एजंटची नियुक्ती करण्यात आली आहे.

• नवीन कार्डचे शुल्क: १९९ रुपये.
• जुने कार्ड बदलल्यास: १४९ रुपये (जुने कार्ड जमा करणे आवश्यक).
• किमान शिल्लक (Minimum Balance): १०० रुपये अनिवार्य.
• रिचार्ज सुविधा: ५० रुपयांच्या पटीत रिचार्ज करता येईल. यासाठी ईटीआयएम मशीन, मोबाइल अ‍ॅप किंवा अधिकृत संकेतस्थळाचा वापर करता येईल.

कोणाला कसे मिळणार कार्ड?

“एसटीचा हा निर्णय म्हणजे परंपरागत व्यवस्थेला डिजिटल स्पर्श देणारा टप्पा आहे. हातात तिकीट आणि सुट्या पैशांची चिंता आता इतिहासजमा होईल. एका स्मार्ट कार्डच्या स्पर्शाने प्रवास अधिक सुलभ आणि सुरक्षित होईल.”

— प्रताप सरनाईक (परिवहन मंत्री)

दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
15:28 12-02-2026