रत्नागिरी: रत्नागिरीचे ग्रामदैवत श्री देव भैरी मंदिराच्या आवारातील ऐतिहासिक वारसा असलेल्या पुरातन बारवेने (विहीर) महाशिवरात्रीनिमित्त स्वर्गीय रूप धारण केले होते. ‘महाराष्ट्र बारव मोहिमे’च्या वतीने या २५० वर्षे जुन्या बारवेची स्वच्छता करून तिथे भव्य दीपोत्सव साजरा करण्यात आला. हजारो पणत्यांच्या प्रकाशाने न्हाऊन निघालेली ही बारव पाहण्यासाठी रत्नागिरीकरांनी मोठी गर्दी केली होती.
शेकडो वर्षांची परंपरा आणि ऐतिहासिक वैभव
श्री देव भैरी मंदिराच्या प्रवेशद्वाराजवळ असलेली ही बारव रत्नागिरीचे सांस्कृतिक वैभव मानली जाते. चारही बाजूंनी पायऱ्या असलेल्या या बारवेच्या बांधकामावरून ती किमान २५० वर्षांहून अधिक जुनी असावी, असा अंदाज तज्ज्ञांनी व्यक्त केला आहे. महाराष्ट्र बारव मोहिमेच्या माध्यमातून राज्यभरातील ३०० पुरातन बारवांवर महाशिवरात्रीला दीपोत्सव केला जातो, त्याच धर्तीवर यावर्षी रत्नागिरीत हा उपक्रम राबवण्यात आला.
स्वयंसेवकांची मेहनत आणि लोकसहभाग
या दीपोत्सवासाठी बारव मोहिमेच्या स्वयंसेवकांनी विशेष परिश्रम घेतले. बारवेची स्वच्छता करून तिच्या प्रत्येक पायरीवर आकर्षक पद्धतीने पणत्या प्रज्वलित करण्यात आल्या.
- प्रमुख आयोजक: श्रीरंग मसुरकर, ओंकार आठवले, अमित आणि रंजिता सूर्यवंशी, अशोक जाधव आणि इतर कार्यकर्त्यांनी या कार्यक्रमाचे नियोजन केले.
- विशेष सहभाग: सिग्मा सर्व्हिसेसचे करकरे कुटुंबीय, ऑनेस्ट गुरुकुलच्या मुख्याध्यापिका सौ. मसुरकर-शिंदे आणि भाविकांनी सहकुटुंब या दीपोत्सवात सहभाग नोंदवला.
- सुकुमार भाटवडेकर यांनी ड्रोन फोटोग्राफीच्या माध्यमातून या विलोभनीय दृश्याचे चित्रीकरण केले.
आता दरवर्षी साजरी होणार ही परंपरा
भैरी देवस्थान ट्रस्टचे अध्यक्ष मुन्नाशेठ सुर्वे यांनी या उपक्रमाचे कौतुक केले. “हा अत्यंत स्तुत्य उपक्रम असून, यावर्षीपासून ही एक नवी परंपरा म्हणून दर महाशिवरात्रीला बारवेवर दीपोत्सव साजरा केला जाईल,” असा मानस त्यांनी व्यक्त केला.
कोकणातील जलसंस्कृती जोपासण्याचा संदेश
कार्यकर्ते श्रीरंग मसुरकर यांनी आवाहन केले की, कोकणात अनेक शिवमंदिरांजवळ अशाच प्रकारच्या पुरातन बारवा आहेत. या ऐतिहासिक जलस्त्रोतांचे संवर्धन व्हावे आणि प्रत्येक शिवमंदिरात अशा प्रकारच्या दीपोत्सवाची परंपरा सुरू व्हावी, जेणेकरून पुढच्या पिढीला या वारशाची ओळख होईल.
विशोष नोंद: रात्रीच्या अंधारात प्रकाशाने उजळलेली ही बारव आणि त्यातील प्रतिबिंब हे उपस्थित भाविकांसाठी आकर्षणाचे केंद्र ठरले होते.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
12:03 17-02-2026
