रत्नागिरी | प्रतिनिधी रत्नागिरी जिल्ह्याच्या समृद्ध निसर्गवैभवात भर घालणाऱ्या पक्षीविश्वाला जागतिक स्तरावर ओळख मिळवून देण्यासाठी रत्नागिरी जिल्हा नियोजन समिती आणि वनविभागाच्या संयुक्त विद्यमाने २२ व २३ फेब्रुवारी रोजी भव्य ‘पक्षीमित्र संमेलन’ आयोजित करण्यात आले आहे. या संमेलनामुळे कोकणातील विविध प्रजातींच्या पक्ष्यांच्या संवर्धनाला आणि अभ्यासाला नवी दिशा मिळणार असल्याची माहिती जिल्हाधिकारी मनुज जिंदल यांनी दिली.
संमेलनाचे सविस्तर वेळापत्रक:
शनिवार, २२ फेब्रुवारी २०२६ (पहिले सत्र):
- स्थळ: हॉटेल कोहिनूर, रत्नागिरी.
- नोंदणी: सकाळी १०:०० वाजता.
- उद्घाटन: सकाळी ११:०० वाजता.
व्याख्याने आणि मार्गदर्शन: १. ‘जंगलाचे शेतकरी’: पक्षीमित्र प्रतिक मोरे हे पक्ष्यांचे जंगलातील महत्त्व आणि त्यांच्या संवर्धनावर प्रकाश टाकणार आहेत. २. ‘सागरी आणि स्थलांतरित पक्षी’: ज्येष्ठ पक्षी अभ्यासक विराज आठल्ये हे कोकण किनारपट्टीवरील स्थलांतरित पक्ष्यांबाबत माहिती देतील. ३. ‘रत्नागिरीतील पक्षी विविधता’: निकिता शिंदे या जिल्ह्यातील पक्ष्यांच्या विविध प्रजातींचे सादरीकरण करणार आहेत.
दुसऱ्या दिवशी प्रत्यक्ष ‘फील्ड व्हिजिट’ (२३ फेब्रुवारी):
संमेलनाच्या दुसऱ्या दिवशी पक्षी निरीक्षणासाठी जिल्ह्यातील महत्त्वाच्या ठिकाणी प्रत्यक्ष भेट दिली जाणार आहे. यामध्ये खालील क्षेत्रांचा समावेश असेल:
- काजरघाटी व देवराई (जंगलातील पक्षी)
- सडामिऱ्या (सागरी पक्षी)
- नाचणे आणि कांदळवन क्षेत्र (खाडी व दलदलीतील पक्षी)
प्रशासनाचे विशेष प्रयत्न
या संमेलनाच्या यशस्वी नियोजनासाठी विभागीय वनअधिकारी गिरीजा देसाई आणि जिल्हा माहिती अधिकारी प्रशांत सातपुते यांनी विशेष मेहनत घेतली असल्याचे जिल्हाधिकाऱ्यांनी नमूद केले. या संमेलनामुळे केवळ पक्षी अभ्यासकांनाच नव्हे, तर पर्यटनालाही मोठी चालना मिळणार आहे.
“रत्नागिरी जिल्ह्यात पक्षांचा अधिवास मोठा आहे. या संमेलनाच्या माध्यमातून येथील पक्षांना एक वेगळी ओळख मिळेल आणि जनसामान्यांमध्ये निसर्ग संवर्धनाची जाणीव जागृत होईल.” — मनुज जिंदल, जिल्हाधिकारी, रत्नागिरी
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
13:10 18-02-2026
