खेड : खेडमध्ये खराब रस्त्यांमुळे शिमगोत्सवात पालख्यांना होणाऱ्या त्रासावरून ठाकरे गटाने नगर परिषद प्रशासनाला धारेवर धरले आहे.
कोकणचा लाडका सण ‘शिमगा’ अवघ्या काही दिवसांवर येऊन ठेपला असताना, खेड शहरातील उखडलेले आणि खड्डेमय रस्ते चिंतेचा विषय बनले आहेत. यावरून शिवसेना (उद्धव बाळासाहेब ठाकरे) पक्षाचे माजी जिल्हाप्रमुख बाळा खेडेकर यांनी नगर परिषद प्रशासन आणि लोकप्रतिनिधींना धारेवर धरले आहे.
नेमकी समस्या काय?
- पाणी योजना ठरली कारणीभूत: शहरात सुरू असलेल्या नवीन पाणीपुरवठा योजनेच्या पाईपलाईनसाठी अनेक ठिकाणी रस्त्यांचे खोदकाम करण्यात आले आहे.
- धूळ आणि अपघाताचे सावट: खोदलेले रस्ते केवळ मातीने भरले असून त्यांचे डांबरीकरण किंवा कॉंक्रिटीकरण झालेले नाही. यामुळे शहरात धूळप्रदूषण वाढले असून दुचाकी घसरून अपघात होण्याचे प्रमाण वाढले आहे.
- शिमगोत्सवात अडथळा: खेडमध्ये ग्रामदैवतांच्या पालख्या रात्री उशिरापर्यंत विविध भागात फिरतात. उखडलेल्या रस्त्यांमुळे भक्तांच्या सुरक्षेचा प्रश्न निर्माण झाला असून ‘पालख्यांना खड्ड्यातूनच जावे लागणार का?’ असा संतप्त सवाल खेडेकर यांनी केला आहे.
नगर परिषद प्रशासनाने तातडीने रस्त्यांची दुरुस्ती करून किमान तात्पुरते डांबरीकरण करावे, अशी मागणी आता जोर धरत आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
12:41 21-02-2026
