मुंबई: उपमुख्यमंत्री अजित पवार यांच्या विमान प्रवासादरम्यान तांत्रिक बिघाड झाल्याची घटना ताजी असतानाच, आता आमदार रोहित पवार यांनी एक अत्यंत धक्कादायक खुलासा केला आहे. २०२३ मध्ये तत्कालीन मुख्यमंत्री एकनाथ शिंदे यांच्या दावोस दौऱ्यावेळी ‘व्हीएसआर’ (VSR) कंपनीच्या निष्काळजीपणामुळे त्यांचे विमान इराण किंवा इराकच्या लढाऊ विमानांनी पाडले असते, असा खळबळजनक दावा रोहित पवारांनी केला आहे.
नेमकं काय घडलं होतं २०२३ मध्ये?
रोहित पवार यांनी पत्रकार परिषदेत १६ ते २० जानेवारी २०२३ दरम्यानच्या प्रवासाचा तपशील मांडला. त्यांच्या दाव्यानुसार:
- प्रवास: तत्कालीन मुख्यमंत्री एकनाथ शिंदे आणि सनदी अधिकारी भूषण गगराणी VSR कंपनीच्या ‘VT-CMR’ विमानातून दावोसला (झुरिच) जात होते.
- विमानाचा मार्ग: मुंबईतून निघालेले हे विमान इंधन भरण्यासाठी बहरीनला थांबले. त्यानंतर पुढे जाताना ते इराणच्या हवाई क्षेत्रात शिरले.
- इराणचा इशारा: या विमानाकडे ओव्हरफ्लाईटची (हवाई क्षेत्र वापरण्याची) रीतसर परवानगी नव्हती. त्यामुळे इराणने तातडीने विमान परत नेण्याचा आदेश दिला, अन्यथा लढाऊ विमानांद्वारे ते पाडले जाईल, असा गंभीर इशारा दिला.
इराणनंतर इराकनेही दिला होता इशारा!
रोहित पवारांनी पुढे सांगितले की, इराणच्या धमकीनंतर वैमानिकाने मार्ग बदलून विमान इराकच्या हवाई क्षेत्रात नेले. मात्र, तिथेही तोच प्रकार घडला. इराकनेही हे विमान त्वरित हवाई क्षेत्रातून बाहेर काढण्यास सांगितले आणि विमान पाडण्याची धमकी दिली. अखेर विमानातील इंधन संपत आल्याने ते पुन्हा बहरीनला नेण्यात आले. तिथे ३ तास थांबून आवश्यक परवानग्या मिळवल्यानंतरच विमान झुरिचकडे रवाना झाले.
VSR कंपनीवर गंभीर आरोपांची सरबत्ती
रोहित पवार यांनी VSR कंपनीला ‘बेजबाबदार’ ठरवत अनेक गंभीर आरोप केले आहेत:
- परवानग्यांचा अभाव: राज्याच्या मुख्यमंत्र्यांचा प्रवास असतानाही आवश्यक हवाई परवानग्या न घेता विमान उडवून मुख्यमंत्र्यांचा जीव धोक्यात घातला.
- UAE मधील बंदी: नियमांचे उल्लंघन केल्यामुळे युएई (UAE) सरकारने या कंपनीवर ६ महिन्यांची बंदी घातली होती.
- कोविडकाळातील लूट: कोरोना संकटात ही कंपनी रुग्णांकडून भरमसाठ पैसे उकळत असल्याचा आरोपही पवारांनी केला.
- व्यावसायिक नियमांचे उल्लंघन: प्रायव्हेट चार्टर विमानातील सीट विकण्याचा अधिकार नसतानाही या कंपनीने सीट विकल्याचे त्यांनी नमूद केले.
“अजित पवारांसोबत जो प्रकार झाला, तसाच काहीसा प्रकार एकनाथ शिंदेंबाबत परदेशात घडणार होता का? याबाबत खुद्द एकनाथ शिंदेच अधिक माहिती देऊ शकतात,” असे सूचक विधान रोहित पवारांनी केले आहे.
सुरक्षेचा प्रश्न ऐरणीवर
राज्याच्या अतिमहत्त्वाच्या व्यक्तींच्या (VVIP) प्रवासासाठी वापरल्या जाणाऱ्या खासगी कंपन्यांच्या विश्वासार्हतेवर आता प्रश्नचिन्ह उपस्थित होत आहे. अजित पवारांनंतर आता एकनाथ शिंदेंच्या जुन्या प्रवासाचा हा मुद्दा समोर आल्याने राजकीय वर्तुळात मोठी खळबळ उडाली आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
16:26 04-03-2026
