रत्नागिरी: रत्नागिरी जिल्हा परिषद आणि पंचायत समितीच्या सभापती, उपसभापती तसेच अध्यक्ष आणि उपाध्यक्षपदाच्या निवडणुकांचे वेध लागले आहेत. या पार्श्वभूमीवर राजकीय पक्षांनी आपली कंबर कसली असून, भारतीय जनता पार्टी आणि शिवसेना (उद्धव बाळासाहेब ठाकरे) पक्षाने जिल्हाधिकाऱ्यांसमोर ‘ओळख परेड’ करून आपल्या गटनेत्यांची अधिकृत निवड केली आहे.
भाजपच्या गटनेतेपदी प्रमोद अधटराव
भाजपने जिल्हा परिषदेतील आपल्या गटाची स्थापना केली असून गटनेतेपदाची धुरा संगमेश्वरचे तालुकाध्यक्ष आणि कोसुंब गटातून विजयी झालेले प्रमोद अधटराव यांच्याकडे सोपवली आहे. भाजपचे जिल्हा परिषदेत एकूण चार सदस्य निवडून आले आहेत. बुधवारी जिल्हाधिकाऱ्यांसमोर गटस्थापनेचे पत्र सादर करण्यात आले.
शिवसेना (उबाठा) गटनेतेपदी माजी अध्यक्ष विक्रांत जाधव
दुसरीकडे, शिवसेना (उबाठा) पक्षाने जिल्हा परिषदेच्या गटनेतेपदी माजी जिल्हा परिषद अध्यक्ष विक्रांत जाधव यांची निवड केली आहे. अनुभवाचा विचार करून पक्षाने त्यांच्यावर ही महत्त्वाची जबाबदारी सोपवली आहे.
पंचायत समित्यांचे नवे गटनेते
जिल्हा परिषदेसोबतच विविध पंचायत समित्यांसाठीही भाजपने आपले गटनेते जाहीर केले आहेत:
- चिपळूण पं.स.: विनोद भुरण
- रत्नागिरी पं.स.: संयोग (दादा) दळी
- गुहागर पं.स.: निलेश सुर्वे
- संगमेश्वर पं.स.: महेश जडयार
तसेच शिवसेना (उबाठा) पक्षाने खालील प्रमाणे पंचायत समिती गटनेते निवडले आहेत:
- चिपळूण पं.स.: गौरव पाटेकर
- खेड पं.स.: अजय चाळके
निवडणुकांचे वेळापत्रक
जिल्ह्यातील स्थानिक स्वराज्य संस्थांच्या रिक्त पदांसाठी मतदानाची प्रक्रिया खालील तारखांना पार पडणार आहे:
- ९ मार्च: पंचायत समिती सभापती व उपसभापती निवडणूक.
- १६ मार्च: जिल्हा परिषद अध्यक्ष व उपाध्यक्ष निवडणूक.
या निवडींनंतर कार्यकर्त्यांमध्ये उत्साहाचे वातावरण असून नवनियुक्त पदाधिकाऱ्यांवर अभिनंदनाचा वर्षाव होत आहे. जिल्ह्यात सर्वात मोठा पक्ष असणाऱ्या शिवसेना (शिंदे गट) पक्षाने यापूर्वीच आपल्या गटनेत्यांची निवड करून जिल्हाधिकाऱ्यांसमोर गटाची स्थापना केली आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
12:09 05-03-2026
