खेड (रत्नागिरी): खेड तालुक्यातील लोटे परशुराम औद्योगिक वसाहतीमधील सुरक्षा व्यवस्थेचा प्रश्न पुन्हा एकदा ऐरणीवर आला आहे. येथील मे. ॲक्वा फुड एक्झीम या कंपनीत अज्ञात चोरट्यांनी धाडसी चोरी करत सुमारे १० लाख रुपये किमतीचे मशिनरीचे सुटे भाग चोरून नेले आहेत. विशेष म्हणजे, चोरीला गेलेले हे सुटे भाग परदेशातून आयात केलेले होते.
कंपनी बंद असल्याचा चोरट्यांनी घेतला फायदा
ही चोरी २५ फेब्रुवारी ते १४ मार्च २०२६ या कालावधीत घडली असल्याचे समोर आले आहे. संबंधित कंपनीची मशिनरी बँक ऑफ महाराष्ट्र, शाखा चिपळूण यांच्याकडे तारण ठेवण्यात आली होती. कंपनी बंद असल्याचा फायदा घेत चोरट्यांनी परिसरात प्रवेश केला आणि कटर किंवा अन्य हत्यारांच्या साहाय्याने महागड्या मशिनरींचे भाग कापून लंपास केले.
कोणते साहित्य चोरीला गेले?
चोरट्यांनी अत्यंत तांत्रिक समज असलेल्या व्यक्तीप्रमाणे ‘डॅनटेक फ्रिजींग सिस्टीम’ (डेन्मार्क) येथून आयात केलेल्या मशिनरींना लक्ष्य केले. यामध्ये प्रामुख्याने खालील भागांचा समावेश आहे:
- कन्वेअर सिस्टम: कुकिंग, कुलिंग आणि अल्ट्राफ्लो फ्रीजिंग लाईनचे विविध कन्वेअर्स.
- तांत्रिक भाग: इन्स्पेक्शन इन फीड कन्वेअर आणि ट्रान्सफर कर्व्हड कन्वेअर.
- महागडा व्हॉल्व्ह: कुकरसाठी वापरला जाणारा सुमारे १५ लाख रुपये मूळ किंमत असलेला प्रेशर व्हॉल्व्ह.
- इतर: ग्रँडिंग मशिन्सचे कन्वेअर्स.
परदेशातून आयात केलेले साहित्य
मूळचे कोलकता येथील आणि सध्या चिपळूण येथे राहणारे धिरजलाल मंटूलाल बरुई यांनी याप्रकरणी खेड पोलीस ठाण्यात फिर्याद दिली आहे. चोरीला गेलेले सर्व साहित्य २०२१ मध्ये युरो आणि डॉलरमध्ये व्यवहार करून युरोपमधून मागवण्यात आले होते. या साहित्याची सध्याची अंदाजे किंमत १० लाख रुपये असल्याचे फिर्यादीत नमूद करण्यात आले आहे.
सुरक्षा व्यवस्थेवर प्रश्नचिन्ह
लोटे परशुराम सारख्या गजबजलेल्या औद्योगिक वसाहतीत इतक्या मोठ्या प्रमाणावर मशिनरींचे भाग कापून नेले जात असताना कोणालाही सुगावा लागला नाही, यामुळे उद्योजकांमध्ये भीतीचे आणि आश्चर्याचे वातावरण आहे. या घटनेमुळे औद्योगिक क्षेत्रातील सुरक्षेवर मोठे प्रश्नचिन्ह निर्माण झाले आहे.
पोलीस कारवाई: खेड पोलिसांनी घटनास्थळाचा रितसर पंचनामा केला असून अज्ञात चोरट्यांविरुद्ध गुन्हा दाखल केला आहे. पोलीस आता या टोळीचा शोध घेण्यासाठी परिसरातील सीसीटीव्ही फुटेज आणि संशयितांची चौकशी करत आहेत.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
11:31 18-03-2026
