तेहरान: मध्य-पूर्वेतील तणाव आता टोकाच्या भूमिकेपर्यंत पोहोचला असून इराण आणि अमेरिका यांच्यातील युद्ध थांबण्याची चिन्हे दिसत नाहीत. अमेरिकेचे राष्ट्राध्यक्ष डोनाल्ड ट्रम्प यांनी इराणमध्ये सैन्य उतरवण्याचे संकेत दिल्यानंतर आता इराणनेही अत्यंत आक्रमक पवित्रा घेतला आहे. “शत्रूने जमिनीवरून हल्ला केला, तर एकही व्यक्ती जिवंत राहणार नाही,” असा खळबळजनक इशारा इराणचे लष्करप्रमुख मेजर जनरल अमीर हातामी यांनी गुरुवारी दिला आहे.
“निर्धारित उद्दिष्ट्ये साध्य करेपर्यंत माघार नाही”
इराणच्या फार्स वृत्तसंस्थेनुसार, लष्करप्रमुख हातामी यांनी स्पष्ट केले की, जोपर्यंत इराण आपली निर्धारित उद्दिष्ट्ये साध्य करत नाही, तोपर्यंत शत्रूचा पाठलाग थांबणार नाही. तेहरान लष्करी कारवाई तीव्र करण्यासाठी पूर्णपणे सज्ज असून, इस्लामिक इराणची रणनीती स्पष्ट असल्याचे त्यांनी सांगितले. आपल्या देशावरून युद्धाची छाया दूर करणे हेच आमचे प्राथमिक ध्येय असल्याचेही त्यांनी नमूद केले.
इस्रायली ड्रोन पाडल्याचा दावा
या युद्धाच्या धामधुमीत इराणने मोठी लष्करी कारवाई केल्याचा दावा केला आहे. शिराझ शहराच्या आकाशात घिरट्या घालणारा इस्रायलचा ‘हर्मिस ९००’ (Hermis 900) हा अत्याधुनिक ड्रोन पाडल्याचे इराणने म्हटले आहे. इराणने नेहमीच अमेरिका आणि इस्रायलला आपले कट्टर शत्रू मानले असून, त्यांच्या कोणत्याही हालचालीवर सूक्ष्म लक्ष ठेवले जात असल्याचे लष्करप्रमुखांनी स्पष्ट केले.
होर्मुझच्या सामुद्रधुनीवर नाकेबंदी: जागतिक तेल पुरवठा धोक्यात!
२८ फेब्रुवारी रोजी अमेरिका आणि इस्रायलने इराणची राजधानी तेहरानसह विविध ठिकाणांवर केलेल्या हल्ल्यात मोठ्या प्रमाणात जीवित व वित्तहानी झाली होती. याला प्रत्युत्तर म्हणून इराणनेही अमेरिकन लष्करी तळांना लक्ष्य केले आहे.
या वाढत्या तणावामुळे होर्मुझच्या सामुद्रधुनीवर (Strait of Hormuz) अघोषित नाकेबंदी झाली आहे. हा मार्ग जागतिक बाजारपेठेसाठी तेल आणि द्रवीकृत नैसर्गिक वायू (LNG) पुरवठ्याचा मुख्य मार्ग असल्याने, याचा परिणाम आंतरराष्ट्रीय तेल निर्यात आणि उत्पादनावर होत आहे, ज्यामुळे जागतिक अर्थव्यवस्थेत चिंतेचे वातावरण आहे.
लष्कराची आक्रमक आणि बचावात्मक सज्जता
शत्रूच्या कोणत्याही हल्ल्याच्या पद्धतीला उत्तर देण्यासाठी इराणचे लष्कर आक्रमक आणि बचावात्मक अशा दोन्ही स्तरावर तयार आहे. “शत्रूच्या हालचालींवर आमचे बारीक लक्ष असून, योग्य वेळी अचूक योजनांची अंमलबजावणी केली जाईल,” असे मेजर जनरल हातामी यांनी ठणकावून सांगितले आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
16:57 02-04-2026
