खेड (रत्नागिरी): लोटे परशुराम एमआयडीसी येथील लक्ष्मी ऑर्गॅनिक इंडस्ट्रीज लिमिटेड (Laxmi Organic Industries Ltd.) या प्रकल्पाबाबत कंपनीने आपली भूमिका अधिकृतपणे स्पष्ट केली आहे. हा प्रकल्प सर्व पर्यावरणीय, सुरक्षा आणि नियामक नियमांचे काटेकोरपणे पालन करत असून पर्यावरणाला कोणतीही हानी पोहोचवत नसल्याचा दावा कंपनीच्या वरिष्ठ अधिकाऱ्यांनी केला आहे.
शुक्रवारी आयोजित एका विशेष पत्रकार परिषदेत कंपनीने प्रकल्पाच्या कार्यक्षमतेवर आणि सुरक्षेबाबत असलेल्या तंत्रज्ञानावर शिक्कामोर्तब केले.
प्रगत तंत्रज्ञान आणि ‘क्लोज्ड-लूप’ प्रणालीचा वापर
उत्पादन विभागाचे वरिष्ठ उपाध्यक्ष दीपक पाटील यांनी माहिती देताना सांगितले की, लोटे येथील प्रकल्प स्थापनेपासूनच सर्व आवश्यक वैधानिक परवानग्या घेऊन कार्यरत आहे. प्रकल्पात ‘क्लोज्ड-लूप’ (Closed-loop) प्रणालीचा वापर केला जातो, ज्यामुळे कोणतेही हानिकारक घटक किंवा उत्सर्जन उघड्यावर येण्याची शक्यता नसते. सांडपाणी प्रक्रियेसाठी उच्च क्षमतेची अत्याधुनिक संयंत्रे उभारण्यात आली असून, प्रक्रिया केलेले पाणी आणि कचरा केवळ राज्य शासनाच्या मान्यताप्राप्त केंद्रांकडेच विल्हेवाटीसाठी पाठवला जातो.
डिजिटल ट्रेसेबिलिटी आणि सुरक्षा मानके
कंपनीने सुरक्षेच्या बाबतीत पारदर्शकता जपण्यासाठी डिजिटल ट्रेसेबिलिटी प्रणाली (Digital Traceability System) कार्यान्वित केली आहे. यामुळे कचरा व्यवस्थापनावर बारीक लक्ष ठेवता येते. प्रकल्पाचे फ्लोअरिंग आणि सांडपाणी प्रक्रिया केंद्रात उच्च दर्जाची जागतिक मानके पाळली जातात, अशी माहिती यावेळी देण्यात आली.
देशाच्या अर्थव्यवस्थेत महत्त्वाचे योगदान
या प्रकल्पात तयार होणारी उत्पादने सध्याच्या जागतिक गरजांसाठी अत्यंत कळीची आहेत. विशेषतः:
- सेमीकंडक्टर आणि संरक्षण क्षेत्र
- इलेक्ट्रिक वाहने (EV)
- वैद्यकीय उपकरणे आणि औषधनिर्मिती या क्षेत्रांना लागणारा महत्त्वाचा कच्चा माल या प्रकल्पातून पुरवला जातो. विशेषतः फ्ल्युरिन रसायनशास्त्राचा वापर जागतिक मानकांनुसारच केला जातो, असे कंपनीने स्पष्ट केले.
पारदर्शकतेसाठी कंपनी कटिबद्ध
“पर्यावरणाचे रक्षण करतानाच देशाच्या अर्थव्यवस्थेला बळकटी देणे हे आमचे प्राथमिक उद्दिष्ट आहे. आम्ही नियामक संस्था आणि स्थानिक लोकांशी सतत संवाद साधून पारदर्शकता जपण्यासाठी कटिबद्ध आहोत,” असे वरिष्ठ अधिकाऱ्यांनी नमूद केले.
या पत्रकार परिषदेला कंपनीचे उत्पादन विभागाचे अध्यक्ष राजेश नाईक आणि पर्यावरण, आरोग्य व सुरक्षा विभागाचे कार्यकारी उपाध्यक्ष उदय वैशंपायन उपस्थित होते. या स्पष्टीकरणामुळे लोटे एमआयडीसीमधील लक्ष्मी ऑर्गॅनिक प्रकल्पाच्या सुरक्षेबाबतची वस्तुस्थिती समोर आली आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
10:20 04-04-2026
