Bigg Boss Marathi Season 6 Ticket To Finale Winner: ‘बिग बॉस मराठी’च्या सहाव्या सीझनचा थरार आता आपल्या अंतिम टप्प्यात पोहोचला आहे. प्रेक्षकांची उत्सुकता शिगेला पोहोचलेली असतानाच, घराला या सीझनचा पहिला ‘फिनालिस्ट’ मिळाला आहे. अत्यंत चुरशीच्या ठरलेल्या ‘तिकीट टू फिनाले’ टास्कमध्ये बाजी मारत तन्वी कोलते (Tanvi Kolte) हिने ग्रँड फिनालेमध्ये आपले स्थान पक्कं केलं आहे.
अटीतटीची लढत: बुद्धी आणि वेगाचा कस
गेल्या आठवड्यात सागर कारंडे घराबाहेर पडल्यानंतर घरात ७ सदस्य उरले होते. बिग बॉसने जाहीर केलेल्या ‘तिकीट टू फिनाले’ टास्कसाठी घरातील सदस्यांनी परस्पर संमतीने राकेश बापट, तन्वी कोलते आणि अनुश्री माने यांची निवड केली. या तिघांमध्ये महाअंतिम फेरीत थेट प्रवेश मिळवण्यासाठी जोरदार लढत पाहायला मिळाली.
काय होता ‘कोळ्याचं जाळं’ टास्क?
हा टास्क केवळ शारीरिक ताकदीचा नव्हता, तर तो बुद्धी आणि वेगाचा मेळ घालणारा होता. मैदानावर एक ‘महाकाय कोळ्याचं जाळं’ उभारण्यात आलं होतं. जाळ्याच्या एका बाजूला ७ प्रश्न आणि दुसऱ्या बाजूला त्यांची उत्तरं होती. स्पर्धकांना ते जाळं भेदून योग्य उत्तरं शोधायची होती आणि ती प्रश्नांसमोर लावायची होती.
कोणाला किती वेळ लागला?
- राकेश बापट: टास्क पूर्ण करण्यासाठी साधारण २१ मिनिटे घेतली.
- अनुश्री माने: ९ मिनिटांत टास्क पूर्ण केला.
- तन्वी कोलते: केवळ साडेसहा मिनिटांत अचूक उत्तरे लावत तन्वीने सर्वांना थक्क केले.
सर्वात कमी वेळात टास्क पूर्ण केल्यामुळे तन्वी कोलते या सीझनची पहिली ‘तिकीट टू फिनाले’ विजेती ठरली आहे.
तन्वी आणि रेवा ‘Safe’; ५ तगड्या स्पर्धकांवर नॉमिनेशनची टांगती तलवार
तन्वीने तिकीट टू फिनाले जिंकल्यामुळे ती १३ व्या आणि १४ व्या आठवड्यासाठी पूर्णपणे सुरक्षित झाली आहे. दुसरीकडे, रेवा कौरासे या आठवड्याची कॅप्टन असल्यामुळे ती देखील सेफ आहे. मात्र, उर्वरित पाच सदस्य म्हणजेच राकेश बापट, विशाल कोटीयान, दिपाली सय्यद, अनुश्री माने आणि राखी सावंत हे सर्व या आठवड्यासाठी नॉमिनेट झाले आहेत.
ग्रँड फिनालेच्या शर्यतीत आता कोण उरणार?
‘तिकीट टू फिनाले’ जिंकून तन्वीने आपली दावेदारी मजबूत केली असली, तरी नॉमिनेट झालेल्या सदस्यांमध्ये मोठी चुरस आहे. ट्रॉफीच्या अगदी जवळ येऊन आता कोणत्या स्पर्धकाचा प्रवास संपणार, हे पाहणे औत्सुक्याचे ठरेल.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
12:38 08-04-2026
