नोकर भरती प्रक्रिया जलद, पारदर्शक आणि आधुनिक करण्यासाठी संगणकाधारित पद्धतीचा अवलंब; ५० ते ६० हजार पदांच्या पार्श्वभूमीवर मोठा निर्णय
मुंबई:
MPSC CBT Exams म्हणजेच महाराष्ट्र लोकसेवा आयोग (एमपीएससी) मार्फत घेतली जाणारी नोकर भरती प्रक्रिया अधिक जलद, पारदर्शक आणि आधुनिक करण्यासाठी आता संगणकाधारित परीक्षा (सीबीटी – Computer Based Test) पद्धतीचा अवलंब करण्याचा निर्णय घेण्यात आला आहे. सामान्य प्रशासन विभाग मंत्री आशिष शेलार यांनी विधान परिषदेत या संदर्भातील महत्त्वपूर्ण माहिती अधिकृतपणे दिली. वाढलेल्या पदसंख्येच्या पार्श्वभूमीवर भरती प्रक्रिया अधिक वेगवान आणि कार्यक्षम करणे गरजेचे असल्याने हा निर्णय घेण्यात आला असल्याचे त्यांनी स्पष्ट केले.
पदसंख्या वाढल्यामुळे भरती प्रक्रियेला गती देण्याची गरज
राज्य शासनाने ५ मे २०२० रोजी घेतलेल्या धोरणात्मक निर्णयानंतर विविध सरकारी विभागांतील अनेक पदे एमपीएससीकडे वर्ग करण्यात आली आहेत. पूर्वी दरवर्षी सुमारे ७ ते ७.५ हजार पदांची भरती एमपीएससीमार्फत केली जात होती. मात्र, आता ही संख्या दरवर्षी तब्बल ५० ते ६० हजार पदांपर्यंत जाणार आहे. या प्रचंड प्रमाणात वाढलेल्या पदसंख्येमुळे जुन्या पद्धतीने परीक्षा घेणे शक्य नसून, भरती प्रक्रियेला गती देण्यासाठी ‘सीबीटी’ पद्धती अधिक उपयुक्त आणि आवश्यक असल्याचा दावा मंत्री आशिष शेलार यांनी केला.
ऑफलाईन परीक्षांमधील परीक्षा केंद्रांचे मोठे आव्हान होणार दूर
पारंपारिक पद्धतीने ऑफलाईन परीक्षा घेण्यासाठी शासनाला पूर्णपणे शाळा व महाविद्यालयांच्या पायाभूत सुविधांवर अवलंबून राहावे लागते. याच कालावधीत केंद्र सरकार, विविध राज्ये, बँका आणि इतर नामांकित संस्थांच्या स्पर्धा परीक्षा देखील होत असल्याने परीक्षा केंद्रांची उपलब्धता मिळवणे हे प्रशासनासमोर एक मोठे आव्हान ठरते. नवीन संगणकाधारित (CBT) पद्धतीमुळे केंद्रांच्या उपलब्धतेची ही मोठी समस्या बऱ्याच अंशी दूर होणार आहे.
ज्या वर्षी परीक्षा, त्याच वर्षी नियुक्ती देण्याचे शासनाचे उद्दिष्ट
राज्य शासनाने उमेदवारांच्या हिताचा विचार करून एक नवीन उद्दिष्ट निश्चित केले आहे. त्यानुसार, उमेदवारांना ज्या वर्षात परीक्षा घेतली जाईल, त्याच वर्षात अंतिम निकाल लावून थेट नियुक्ती मिळवून देण्याचा शासनाचा मानस आहे. प्रशासकीय पदे दीर्घकाळ रिक्त राहू नयेत आणि स्पर्धा परीक्षेची तयारी करणाऱ्या विद्यार्थ्यांना विनाकारण अनेक वर्षे निकालासाठी प्रतीक्षा करावी लागू नये, यासाठी या संपूर्ण भरती प्रक्रियेला आधुनिक तंत्रज्ञानाच्या मदतीने वेग दिला जाणार आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
15:04 01-07-2026
