२८ जानेवारी २०२६ रोजी झालेल्या दुर्दैवी अपघातात गमावले नेतृत्व; मुख्य प्रतोद चेतन तुपे यांनी दिले शिफारस पत्र
मुंबई: Ajit Pawar Posthumous Padma Vibhushan म्हणजेच राष्ट्रवादी काँग्रेसचे राष्ट्रीय अध्यक्ष आणि राज्याचे माजी उपमुख्यमंत्री स्व. अजित अनंतराव पवार उर्फ अजितदादा पवार यांना मरणोत्तर ‘पद्मविभूषण’ पुरस्काराने सन्मानित करण्यात यावे, अशी अधिकृत मागणी महाराष्ट्र विधानमंडळातील राष्ट्रवादी काँग्रेस पक्षाच्या सर्व विधानसभा आणि विधानपरिषदेच्या आमदारांनी केली आहे. या संदर्भातील एक विशेष विनंती पत्र राष्ट्रवादी काँग्रेस पक्षाच्या आमदारांच्या वतीने मुख्यमंत्री देवेंद्र फडणवीस यांना देण्यात आले आहे.
२८ जानेवारी २०२६ च्या दुर्दैवी अपघाताने युगाचा अंत
पक्षाचे मुख्य प्रतोद चेतन तुपे यांनी मुख्यमंत्र्यांना लिहिलेल्या पत्रात म्हटले आहे की, २८ जानेवारी २०२६ रोजी झालेल्या अत्यंत दुर्दैवी अपघातात महाराष्ट्राने आपले लाडके नेते आणि राज्याचे उपमुख्यमंत्री अजितदादा पवार यांना गमावले. त्यांचे अचानक जाणे हे महाराष्ट्राच्या आणि देशाच्या राजकारणातील एका युगाचा अंत झाल्यासारखे असून, ही कधीही न भरून निघणारी हानी आहे. त्यांनी आपल्या प्रदीर्घ राजकीय कारकिर्दीत महाराष्ट्राच्या सामाजिक, आर्थिक आणि औद्योगिक विकासाला एक नवी दिशा दिली.
विक्रमी अर्थसंकल्प आणि ‘ॲक्शन ओरिएंटेड’ नेतृत्व
पत्रात अजितदादांच्या प्रशासकीय कौशल्याचा गौरव करताना सांगण्यात आले आहे की, त्यांनी राज्याचे अर्थमंत्री म्हणून विक्रमी वेळा राज्याचा अर्थसंकल्प मांडून प्रत्येक क्षेत्राला न्याय दिला.
- क्रांतिकारी निर्णय: पायाभूत सुविधा, रस्ते विकास, मेट्रो आणि सिंचन क्षेत्रात त्यांनी घेतलेले निर्णय मैलाचे दगड ठरले.
- शेतकऱ्यांना मदत: महाराष्ट्रातील सहकार चळवळ मजबूत करण्यात आणि शेतकऱ्यांना संकटकाळात थेट आर्थिक मदत मिळवून देण्यात त्यांनी नेहमीच आग्रही भूमिका घेतली.
- कणखर प्रशासक: अहोरात्र कष्ट करणारे लोकप्रतिनिधी आणि ‘अॅक्शन ओरिएंटेड’ नेते म्हणून त्यांनी जनमानसावर अधिराज्य गाजवले.
केंद्र सरकारकडे तातडीने शिफारस पाठवण्याची विनंती
अजितदादांच्या या महान राष्ट्रसेवेचा आणि नेतृत्वाचा यथोचित सर्वोच्च गौरव म्हणून त्यांना भारत सरकारचा अत्यंत मानाचा ‘पद्मविभूषण’ (मरणोत्तर) पुरस्कार जाहीर व्हावा, ही महाराष्ट्रातील तमाम जनतेची तीव्र भावना आहे. त्यांच्या कार्याची योग्य दखल घेऊन केंद्र सरकारने त्यांना हा पुरस्कार द्यावा, अशी अधिकृत शिफारस महाराष्ट्र शासनाने तातडीने केंद्र सरकारकडे पाठवावी, अशी आग्रही विनंती या पत्राद्वारे करण्यात आली आहे.
यावेळी पत्र सुपूर्द करताना राष्ट्रवादी काँग्रेसचे ज्येष्ठ मंत्री हसन मुश्रीफ, मुख्य प्रतोद चेतन तुपे, माजी मंत्री अनिल पाटील, माणिकराव कोकाटे, संजय बनसोड, आमदार सरोज अहिरे यांच्यासह पक्षाचे अनेक आमदार उपस्थित होते.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
02:22 10-07-2026
