धर्मध्वजारोहण सोहळ्याने कुंभपर्वाचा प्रारंभ; गोदावरी रामकुंडावर राष्ट्रपतींच्या हस्ते पूजन
नाशिक / त्र्यंबकेश्वर:
Nashik Kumbh Mela 2026 चा अधिकृत शुभारंभ शनिवारी, ३१ ऑक्टोबर २०२६ रोजी भारताच्या राष्ट्रपती द्रौपदी मुर्मू यांच्या शुभहस्ते नाशिक आणि त्र्यंबकेश्वर येथे एकाच मंगलमुहूर्तावर अत्यंत भक्तिमय आणि उत्साही वातावरणात पार पडला. नाशिक जिल्ह्यातील पवित्र गोदावरी नदीच्या रामकुंडावर राष्ट्रपतींच्या हस्ते विधिवत गंगापूजन करण्यात आले तसेच वैदिक मंत्रोच्चारात धर्मध्वज फडकवून या वैश्विक सोहळ्याचा प्रारंभ झाला. नाशिक आणि त्र्यंबकेश्वर या दोन्ही तीर्थक्षेत्री पार पडलेल्या या ऐतिहासिक सोहळ्याला महाराष्ट्राचे राज्यपाल जिष्णू देव वर्मा, मुख्यमंत्री देवेंद्र फडणवीस, उपमुख्यमंत्री एकनाथ शिंदे, उपमुख्यमंत्री सुनेत्रा पवार, ग्रामविकास मंत्री गिरीश महाजन यांच्यासह मंत्रिमंडळातील इतर सदस्य, विविध आखाड्यांचे साधू-संत आणि हजारो भाविक उपस्थित होते.
धार्मिक विधी संपन्न झाल्यानंतर उपस्थितांना संबोधित करताना राष्ट्रपती द्रौपदी मुर्मू यांनी या सोहळ्यात सहभागी होण्याचे भाग्य लाभल्याबद्दल आनंद व्यक्त केला. नाशिक-त्र्यंबकेश्वर ही प्रभू श्रीरामांच्या पदस्पर्शाने पावन झालेली तपोभूमी असून येथे गोदावरी मातेचा सहवास लाभला आहे, अशा पवित्र भूमीला मी कोटी कोटी प्रणाम करते, असे त्या म्हणाल्या. कुंभमेळा हे भारतीय संस्कृती, अध्यात्मिक शक्ती आणि सामाजिकतेचे वैश्विक प्रतीक आहे. सुमारे १४०० वर्षांपूर्वीपासून कुंभमेळ्याचे ऐतिहासिक दाखले मिळतात. जगात चार ठिकाणी भरणारा हा कुंभमेळा भारताच्या सनातन परंपरेचे सामर्थ्य अधोरेखित करतो, असे प्रतिपादन राष्ट्रपतींनी केले.
सोहळ्यात बोलताना राज्याचे मुख्यमंत्री देवेंद्र फडणवीस यांनी प्रशासकीय तयारीचा आढावा घेतला. नाशिक आणि त्र्यंबकेश्वर परिसरातील पायाभूत सुविधांची कामे अत्यंत जलद गतीने सुरू असून संपूर्ण परिसराचा कायापालट केला जात आहे, अशी माहिती त्यांनी दिली. सुरुवातीच्या काळात विकासकामांमुळे स्थानिक नागरिकांना काहीसा त्रास सहन करावा लागला असला, तरी आता प्रकल्प अंतिम टप्प्यात पोहोचत आहेत. साधू-संत हे या सोहळ्याचे मुख्य आधारस्तंभ असून प्रशासन केवळ सेवक म्हणून कार्यरत आहे; आगामी सिंहस्थ कुंभमेळा अत्यंत भव्य आणि दिव्य स्वरूपात पार पाडण्यासाठी राज्य शासन सर्वतोपरी प्रयत्न करेल, अशी ग्वाही मुख्यमंत्र्यांनी दिली.
या सोहळ्याचे महत्त्व विशद करताना मंत्री गिरीश महाजन यांनी सर्व उपस्थितांचे आभार मानले. नाशिक आणि त्र्यंबकेश्वरसाठी हा दिवस अत्यंत ऐतिहासिक, मंगलमय आणि अभिमानाचा असल्याचे त्यांनी नमूद केले. नाशिकला लाभलेला रामायणाचा वारसा, त्र्यंबकेश्वरचे ज्योतिर्लिंग आणि संत-महंतांची तपश्चर्या यांमुळे ही भूमी अद्वितीय बनली आहे. हा सोहळा केवळ धार्मिक उत्सव नसून भारताची श्रद्धा, संस्कृती, राष्ट्रीय एकात्मता आणि सनातन परंपरेचे दर्शन घडवणारा वैश्विक महोत्सव आहे, असे प्रतिपादन त्यांनी केले. तसेच हा सोहळा यशस्वी करण्यासाठी अहोरात्र परिश्रम घेणाऱ्या पोलीस दल, महसूल यंत्रणा आणि स्थानिक प्रशासनाचे त्यांनी कौतुक केले.
नाशिक आणि त्र्यंबकेश्वर येथे एकाच दिवशी पार पडलेल्या या धर्मध्वजारोहणामुळे संपूर्ण नाशिक जिल्ह्यात धार्मिक वातावरण निर्माण झाले आहे. १३ आखाड्यांचे प्रमुख, साधू-महंत आणि तीर्थपुरोहितांच्या उपस्थितीने या सोहळ्याची भव्यता अधिक वाढली. आगामी कुंभपर्वाच्या दृष्टीने नाशिक-त्र्यंबकेश्वर तीर्थक्षेत्रांचा विकास आणि भाविकांसाठीच्या सोयी-सुविधांची कामे वेगाने पूर्ण केली जात असून, या शुभारंभामुळे सिंहस्थ कुंभमेळा २०२६-२८ च्या मुख्य पर्वाला अधिकृत गती मिळाली आहे.
