रत्नागिरी, 06 मे 2025 : रत्नागिरीत एका सायबर फसवणुकीच्या प्रकरणाने खळबळ उडाली आहे. मिनिस्ट्री ऑफ कम्युनिकेशन आणि पोलीस अधिकाऱ्याची खोटी ओळख सांगून एका व्यक्तीने फिर्यादीची 61 लाख 19 हजार 80 रुपयांची फसवणूक केल्याचा धक्कादायक प्रकार उघड झाला आहे. रत्नागिरी सायबर पोलिसांनी या प्रकरणाचा यशस्वी तपास करत गुजरातमधून मुख्य आरोपीला अटक केली आहे.
कशी झाली फसवणूक?
आरोपीने फिर्यादीला मिनिस्ट्री ऑफ कम्युनिकेशनमधून बोलत असल्याचे सांगितले आणि त्यांचे सीमकार्ड बंद होणार असल्याची भीती दाखवली. यानंतर कॉल पुढे पोलिसांकडे फॉरवर्ड करत असल्याचा बहाणा करून दुसऱ्या व्यक्तीने स्वतःला पोलीस अधिकारी असल्याचे भासवले. फिर्यादीच्या कॅनरा बँकेतील खात्यातून 2 कोटी रुपयांचा मनी लॉन्ड्रिंगचा व्यवहार झाल्याची खोटी माहिती देऊन त्यांना दहशत निर्माण केली. यानंतर फिर्यादीला त्यांच्या बँक खात्यात रक्कम जमा करण्यास भाग पाडले गेले, ज्यामुळे त्यांची 61 लाखांहून अधिक रकमेची फसवणूक झाली.
गुन्हा दाखल : फिर्यादीच्या तक्रारीनुसार, रत्नागिरी सायबर पोलीस ठाण्यात गुन्हा रजिस्टर नंबर 05/2024 अंतर्गत भारतीय दंड संहिता 2023 चे कलम 318(4), 319(2), 3(5) आणि माहिती तंत्रज्ञान अधिनियम 2000 चे कलम 66(सी), 66(ड) अन्वये गुन्हा दाखल करण्यात आला आहे.
पोलिसांनी बँकांकडून मिळालेल्या आर्थिक व्यवहारांच्या माहितीचे आणि तांत्रिक विश्लेषणाचे आधार घेत आरोपीची ओळख पटवली. आरोपीचे नाव नेपाल निताई चरण जना असून, तो गुजरातमधील पालसाना तालुक्यातील मेघा प्लाझा येथील हरीदासन रेसिडन्सीमध्ये राहत होता. त्याचे मूळ गाव पश्चिम बंगालमधील पूर्व मेतनीपुर, मोयना आहे. रत्नागिरी सायबर पोलिसांनी गुजरातला तपास पथक पाठवून आरोपीला ताब्यात घेतले. त्याला न्यायालयासमोर हजर केले असता, त्याला 3 दिवसांची पोलीस कोठडी सुनावण्यात आली आहे.
पोलिसांचा यशस्वी तपास
या गुन्ह्याचा तपास आणि आरोपीच्या अटकेसाठी रत्नागिरीचे पोलीस अधीक्षक श्री. धनंजय कुलकर्णी आणि अपर पोलीस अधीक्षक श्रीमती जयश्री गायकवाड यांच्या मार्गदर्शनाखाली सायबर पोलीस ठाण्याच्या प्रभारी अधिकारी पोलीस निरीक्षक श्रीमती स्मिता सुतार यांच्या नेतृत्वाखालील पथकाने काम केले. या पथकात पोहवा संदीप नाईक, पोहवा अमोल गमरे, पोहवा विक्रम पाटील, आणि पोकॉ निलेश शेलार यांचा समावेश होता.
सायबर फसवणुकीपासून सावध रहा!
रत्नागिरी पोलिसांनी नागरिकांना सायबर फसवणुकीपासून सावध राहण्याचे आवाहन केले आहे. कोणीही मिनिस्ट्री ऑफ कम्युनिकेशन, नॅशनल सिक्युरिटी किंवा इतर सरकारी विभागातून बोलत असल्याचे सांगून तुमचे सीमकार्ड बंद होणार आहे किंवा तुमच्या बँक खात्याचा गैरवापर झाला आहे असे सांगत असेल, तर अशा कॉल्सवर विश्वास ठेवू नका.
खालील गोष्टी लक्षात ठेवा:
तुमची वैयक्तिक किंवा बँक खात्याची माहिती कोणालाही देऊ नका.
खाते व्हेरिफिकेशनसाठी पैसे ट्रान्सफर करण्यास सांगणाऱ्या कॉल्सना बळी पडू नका.
अशा संशयास्पद कॉल्सबाबत तातडीने स्थानिक पोलिसांना किंवा सायबर क्राइम सेलला संपर्क साधा.
नागरिकांनी काय करावे?
सायबर गुन्ह्यांपासून स्वतःचा बचाव करण्यासाठी नागरिकांनी सतर्क राहणे गरजेचे आहे. अनोळखी कॉल्स किंवा मेसेजद्वारे येणाऱ्या धमक्यांना बळी पडू नये. सायबर फसवणुकीची माहिती मिळाल्यास तात्काळ रत्नागिरी सायबर पोलीस ठाण्याशी संपर्क साधावा. सायबर गुन्ह्यांविरोधात पोलिसांचे तपास पथक सतत कार्यरत असून, नागरिकांच्या सुरक्षेसाठी कटिबद्ध आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
10:32 AM 06/May/2025
