रत्नागिरी: जिल्ह्यातील आंबा बागायतदारांना आधुनिक तंत्रज्ञानाची जोड देण्यासाठी ‘रत्नागिरी जिल्हा आंबा उत्पादक सहकारी संस्था मर्यादित’ यांच्या वतीने एका महत्त्वपूर्ण माहितीपर कार्यशाळेचे आयोजन करण्यात आले आहे. ही कार्यशाळा मंगळवार, १० फेब्रुवारी २०२६ रोजी सकाळी १० वाजता मारुती मंदिर येथील ‘हॉटेल विवा एक्झिक्युटिव्ह’ मध्ये पार पडणार आहे. आंबा उत्पादनातील आव्हाने आणि शाश्वत उत्पादनासाठी पाण्याचे नियोजन या विषयावर या कार्यशाळेत सखोल चर्चा केली जाणार आहे.
या कार्यक्रमाचे निमंत्रक म्हणून टी. एस. घवाळी, मंदार सरपोतदार आणि प्रसन्न पेठे काम पाहत आहेत. तसेच, ‘SHRINE ISUZU’ (इसुझु इंडिया लिमिटेड) हे या कार्यक्रमाचे मुख्य प्रयोजक आहेत.
तज्ज्ञांचे मार्गदर्शन आणि सत्रे
या कार्यशाळेचे पहिले सत्र ‘शाश्वत आंबा उत्पादनाकरिता ठिबक सिंचन व्यवस्थेची गरज’ या विषयावर होणार आहे. यामध्ये जळगाव येथील जैन इरिगेशनचे तज्ज्ञ श्री. गाडेकर साहेब बागायतदारांना तांत्रिक मार्गदर्शन करणार आहेत. त्यानंतर दुसऱ्या सत्रात ठिबक सिंचनासाठी उपलब्ध असलेल्या शासकीय सबसिडी आणि योजनांची माहिती जिल्हा कृषी अधिकारी श्री. सदाफुले साहेब यांच्याकडून दिली जाणार आहे.
शासकीय योजनांचा लाभ घेऊन आंबा उत्पादन कसे वाढवावे, याबद्दलची ही माहिती जिल्ह्यातील शेतकऱ्यांसाठी अत्यंत महत्त्वाची ठरणार आहे.
भोजनोत्तर कार्यक्रमाची सांगता
कार्यशाळेतील दोन्ही सत्रांनंतर उपस्थित आंबा उत्पादकांसाठी भोजनाची व्यवस्था करण्यात आली असून, भोजनोत्तर कार्यक्रमाची सांगता होईल. रत्नागिरीतील जास्तीत जास्त आंबा बागायतदारांनी या कार्यशाळेचा लाभ घ्यावा, असे आवाहन संस्थेच्या वतीने करण्यात आले आहे.
