रत्नागिरी: ‘हायसिक्युरिटी रजिस्ट्रेशन प्लेट’ (HSRP) बसवण्याच्या मोहिमेत रत्नागिरी जिल्ह्याने संपूर्ण राज्यात बाजी मारली आहे. जिल्ह्यातील सुमारे ७५ टक्के वाहनांनी ही नंबरप्लेट बसवून राज्याच्या कामगिरीत अव्वल स्थान पटकावले आहे. या यशाबद्दल राज्याच्या परिवहन आयुक्तांनी रत्नागिरी जिल्ह्याचे विशेष अभिनंदन केले असले, तरी अद्यापही ज्यांनी ही प्लेट बसवलेली नाही, त्यांच्यावर आता कारवाईचा बडगा उगारला जाणार आहे.
राज्यात रत्नागिरीचा डंका!
रत्नागिरी उपप्रादेशिक परिवहन विभागाकडून (RTO) मिळालेल्या माहितीनुसार:
- नंबरप्लेट बसवलेली वाहने: १,३७,५७१
- बुकिंग केलेले वाहनचालक: १४,३६४
- कामगिरी: ७५% (राज्यात अव्वल)
निवडणुकांमुळे तात्पुरता दिलासा, पण…
एप्रिल २०१९ पूर्वीच्या जुन्या वाहनांसाठी ३१ डिसेंबर २०२५ ही अंतिम मुदत देण्यात आली होती. मात्र, सध्या जिल्ह्यात सुरू असलेल्या जिल्हा परिषद व पंचायत समितीच्या निवडणुकांमुळे ज्यांनी अद्याप नंबरप्लेट बसवली नाही, त्यांना काहीसा दिलासा मिळाला आहे. निवडणुका संपताच परिवहन विभागाचे वायूवेग पथक रस्त्यावर उतरणार असून, विना ‘HSRP’ नंबरप्लेटच्या वाहनांवर कठोर कारवाई केली जाईल.
पाच हजार रुपयांचा दंड भरावा लागणार
ज्या वाहनधारकांनी अद्याप आपली नोंदणी केलेली नाही किंवा नंबरप्लेट बसवलेली नाही, त्यांना भविष्यात ५,००० रुपयांचा दंड भरावा लागणार आहे. ही दंडात्मक कारवाई टाळण्यासाठी वाहनचालकांनी वेळीच आपल्या नंबरप्लेटचे बुकिंग करून त्या बसवून घ्याव्यात, असे आवाहन उपप्रादेशिक परिवहन विभागाने केले आहे.
वाहनधारकांसाठी महत्त्वाचे:
१. ही नंबरप्लेट केवळ अधिकृत विक्रेत्यांकडून किंवा ऑनलाइन पोर्टलवरून बुक करावी. २. जुन्या नंबरप्लेटच्या जागी ही सुरक्षित प्लेट बसवणे अनिवार्य आहे. ३. निवडणुकीनंतर आरटीओ प्रशासनाकडून विशेष तपासणी मोहीम राबवली जाणार आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
17:01 07-02-2026
