रत्नागिरी: रत्नागिरी जिल्हा परिषद आणि पंचायत समिती निवडणुकीच्या निकालांनी जिल्ह्याचे राजकीय वातावरण पूर्णपणे ढवळून काढले आहे. रत्नागिरी तालुक्यातील सर्वच्या सर्व जागांवर विजय मिळवत शिवसेनेने विरोधकांचा अक्षरशः ‘सुपडा साफ’ केला आहे. “उदय सामंत जो शब्द देतो आणि ज्या उमेदवाराचे नाव सांगतो, तोच निवडून येतो हे या निवडणुकीने पुन्हा एकदा सिद्ध केले आहे,” अशी परखड प्रतिक्रिया पालकमंत्री उदय सामंत यांनी विजयानंतर दिली. या विजयामुळे रत्नागिरी तालुक्यावर उदय सामंत यांचे एकहाती वर्चस्व पुन्हा एकदा अधोरेखित झाले आहे.
नंदा मुरकर यांचा ऐतिहासिक विजय आणि दिग्गज नेत्याचा पराभव
या निवडणुकीत गोळप जिल्हा परिषद गटातील लढत संपूर्ण जिल्ह्यासाठी प्रतिष्ठेची ठरली होती. शिवसेनेच्या नंदा मुरकर यांनी उदय बने यांच्यासारख्या दिग्गज नेत्याचा पराभव करत इतिहास घडवला आहे. यावर बोलताना सामंत म्हणाले की, “एकाच व्यक्तीच्या २५-३० वर्षांच्या सत्तेला सुरुंग लावून शिवसेना काय असते, हे नंदा मुरकर यांनी दाखवून दिले आहे.” नंदा मुरकर यांचा विजय हा शिवसेनेच्या कार्यकर्त्यांच्या निष्ठेचा विजय असल्याचे त्यांनी नमूद केले.
हातखंबा आणि पाली गटात शिवसेनेचे वर्चस्व
हातखंबा जिल्हा परिषद गटातील सुयोग कांबळे आणि परशुराम कदम यांच्यातील लढत प्रचंड गाजली होती. अनेक आरोप-प्रत्यारोप आणि राजकीय वातावरण तापलेले असतानाही मतदारांनी शिवसेनेला पसंती दिली. “पाली जिल्हा परिषद गट हे माझे घर आहे. परशुराम कदम यांनी चांगली लढत दिली, त्यांचे मी कौतुक करतो, पण शेवटी जनतेने माझ्या शब्दावर विश्वास ठेवला,” असे उदय सामंत यांनी यावेळी स्पष्ट केले. तालुक्यातील सर्व जागा जिंकून शिवसेनेने विरोधकांचे सर्व दावे फोल ठरवले आहेत.
उद्धव बाळासाहेब ठाकरे (UBT) गटाचे ‘पानिपत’
जिल्हा परिषदेच्या एकूण जागांच्या आकडेवारीवर भाष्य करताना उदय सामंत यांनी विरोधकांवर जोरदार टीका केली. ते म्हणाले, “ज्या जिल्हा परिषदेत यापूर्वी युबीटी गटाचे ३९ सदस्य होते, त्यांचे आज पानिपत झाले असून त्यांची संख्या आता केवळ ३ ते ४ वर आली आहे. शिवसेना स्वतःच्या ताकतीवर ३७ ते ३८ जागा जिंकेल, असा माझा अंदाज आहे.” भाजपच्या साथीने महायुतीने मिळवलेला हा विजय ऐतिहासिक असल्याचे त्यांनी सांगितले.
शिवसैनिक आणि महायुतीच्या पदाधिकाऱ्यांचे मानले आभार
या दैदिप्यमान विजयाचे श्रेय उदय सामंत यांनी रत्नागिरीतील शिवसैनिक, महायुतीचे पदाधिकारी आणि मतदार राजाला दिले आहे. “ज्यांनी ज्यांनी शिवसेना पक्षावर आणि माझ्या नेतृत्वावर विश्वास ठेवला, त्या सर्वांचे मी मनापासून आभार मानतो. आजच्या निकालानंतर माझ्या दृष्टीने कार्यकर्त्यांमधील संघर्ष आता संपलेला आहे,” असे सांगत त्यांनी सर्वांना सोबत घेऊन विकासाची प्रक्रिया पुढे नेण्याचा निर्धार व्यक्त केला.
