रत्नागिरी : रत्नागिरी तालुक्यातील हातखंबा जिल्हा परिषद गटाच्या निकालानंतर सोमवारी कमालीचे वातावरण तापले. अत्यंत अटीतटीच्या झालेल्या या निवडणुकीत अवघ्या काही मतांनी पराभूत झालेले माजी समाजकल्याण सभापती परशुराम कदम यांच्या घरासमोर विजयी उमेदवाराच्या समर्थकांनी फटाके फोडून जल्लोष केल्याने दोन गट समोरासमोर आले होते.
काय घडला नेमका प्रकार?
जिल्हा परिषद निवडणुकीचा निकाल जाहीर झाल्यानंतर हातखंबा गटातील विजयी उमेदवाराच्या कार्यकर्त्यांनी जल्लोष सुरू केला. हा जल्लोष करत असताना कार्यकर्ते मुद्दाम परशुराम कदम यांच्या घरासमोर आले. तिथे मोठ्या प्रमाणात फटाके वाजवून, नारळ फोडून आणि जोरदार घोषणाबाजी करून त्यांनी कदम यांना डिवचण्याचा प्रयत्न केला. कदम यांच्या घराशेजारील जमिनीचा दगडी बांध देखील फोडण्यात आल्याचा गंभीर आरोप यावेळी करण्यात आला आहे.
पोलिस आणि पदाधिकाऱ्यांची मध्यस्थी
- प्रतिबंधात्मक आदेशाचे उल्लंघन: जिल्ह्यात सध्या मिरवणुकांवर बंदी असतानाही अशा प्रकारे जल्लोष आणि फटाकेबाजी झाल्याने पोलिस प्रशासनाच्या भूमिकेवर प्रश्नचिन्ह उपस्थित केले जात आहे.
- कदम यांची प्रतिक्रिया: या घटनेनंतर परशुराम कदम यांनी संताप व्यक्त केला असून, हा प्रकार निव्वळ सूडबुद्धीने केलेला त्रास असल्याचे त्यांनी म्हटले आहे.
- प्रकरण शांत: घटनेची माहिती मिळताच पोलिसांनी घटनास्थळी धाव घेऊन कार्यकर्त्यांना तेथून जाण्यास सांगितले. शिवसेना तालुकाप्रमुख बाबू म्हाप यांनीही घटनास्थळी धाव घेऊन कार्यकर्त्यांना आवर घालण्याचा प्रयत्न केला. या प्रकरणी अद्याप कोणतीही तक्रार दाखल झालेली नाही.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
11:39 11-02-2026
