सरंद ते माखजन बस स्थानकापर्यंत रस्त्याची चाळण
माखजन (रत्नागिरी): ‘Aravali Karjuve Road Potholes’ (आरवली-करजुवे रस्त्यावरील खड्डे) आणि त्यामुळे होणाऱ्या अपघातांचे सत्र संगमेश्वर तालुक्यात संपता संपेनासे झाले आहे. संगमेश्वर तालुक्यातील आरवली-करजुवे या मुख्य रहदारीच्या मार्गावर सध्या मोठ्या प्रमाणावर खड्डे पडले असून, “या जीवघेण्या अपघातांचे सत्र कधी संपणार?” असा संतप्त प्रश्न आता प्रवासीवर्गासह स्थानिक वाहनधारकांकडून विचारला जात आहे. सद्यस्थितीत या प्रमुख मार्गावर अपघातांची मालिकाच सुरू असून सार्वजनिक बांधकाम विभाग आणि संबंधित ठेकेदाराच्या ढिसाळ कारभाराबाबत तीव्र संताप व्यक्त होत आहे.
नालेसफाईअभावी रस्त्यावरून वाहतेय पाणी; मुख्य मार्गाची झाली चाळण
आरवली-करजुवे या मुख्य मार्गाची सध्या अक्षरशः चाळण झाली आहे. सार्वजनिक बांधकाम विभागाकडून रस्त्याच्या दुतर्फा योग्य रितीने नाले सफाई करण्यात आलेली नाही, तसेच रस्त्याकडेला वाढलेली झाडीही तोडली जात नसल्याचे समोर आले आहे. परिणामी, मुसळधार पावसाचे पडणारे पाणी थेट रस्त्यावरून वाहत गेल्याने रस्ता पूर्णपणे उखडून गेला असून त्यावर मोठे खड्डे पडत आहेत. सध्या तालुक्यात पाऊस मोठ्या प्रमाणावर पडत असल्याने रस्त्याला नदीचे स्वरूप आले असून, सरंद ते माखजन बस स्टॅन्डपर्यंतच्या संपूर्ण मार्गावर सलगपणे खड्ड्यांचे साम्राज्य निर्माण झाले आहे.
दुचाकीस्वार तरुण जखमी; अनेक जण पडल्याची ग्रामस्थांची माहिती
या खड्ड्यांमुळे दररोज छोटे-मोठे अपघात घडत आहेत. हुजरे यांच्या घरासमोरील मार्गावर पडलेल्या एका खोल खड्ड्यात दुचाकी आदळल्याने माखजन येथील एका तरुणाच्या खांद्याला जबर दुखापत झाली आहे. या धोकादायक ठिकाणी केवळ हा एकच अपघात झालेला नसून, याच खड्ड्यांत पडून आतापर्यंत अनेक दुचाकीस्वार जखमी झाल्याची माहिती स्थानिक ग्रामस्थांनी दिली आहे. रात्रीच्या वेळी आणि पावसाच्या अंधारात हे खड्डे न दिसल्यामुळे अपघातांची तीव्रता अधिक वाढली आहे.
ठेकेदाराचे काम रखडले: मागील काही दिवसांत संबंधित ठेकेदाराकडून करजुवे मार्गावरील खड्डे भरण्यास तातडीने सुरुवात करण्यात आली होती. मात्र, आज तब्बल दहा दिवस उलटून गेले तरी ठेकेदार किंवा खड्डे भरणारे कामगार पुन्हा या मार्गाकडे फिरकलेच नाहीत. काम अर्धवट टाकून ठेकेदार गायब झाल्यामुळे ग्रामस्थ, वाहनधारक व प्रवासी वर्गाकडून तीव्र असंतोष व्यक्त केला जात आहे.
लोकप्रतिनिधी आणि प्रशासनाकडे तातडीच्या दुरुस्तीची मागणी
पावसाचा जोर कायम असल्याने या मार्गावरील खड्डे अधिक रुंद आणि खोल होत चालले आहेत. जर यावर वेळेत उपाययोजना केली नाही, तर एखादा मोठा जीवघेणा अपघात घडण्याची शक्यता नाकारता येत नाही. त्यामुळे या मार्गाची दुरवस्था समजून घेऊन स्थानिक लोकप्रतिनिधी आणि संबंधित प्रशासकीय अधिकाऱ्यांनी याकडे तत्काळ लक्ष द्यावे आणि या मार्गाची दर्जेदार दुरुस्ती करावी, अशी आग्रही मागणी माखजन आणि करजुवे परिसरातील ग्रामस्थांकडून केली जात आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
16:29 09-07-2026
