कोकणात लवकरच मराठी सिनेमा महोत्सव घेणार!
रत्नागिरी:
कोकणच्या समृद्ध सांस्कृतिक परंपरेचा मुख्य कणा असलेल्या भजन कलेला आता शासकीय राजाश्रय मिळणार आहे. राज्याच्या लोककला अनुदान योजनेत (Kokan Lokkala Grant Scheme) येत्या महिनाभरात भजन कलेचाही समावेश केला जाईल, अशी महत्त्वपूर्ण ग्वाही राज्याचे माहिती तंत्रज्ञान व सांस्कृतिककार्यमंत्री ॲड. आशिष शेलार यांनी रत्नागिरीत दिली. याशिवाय, येत्या काळात कोकण प्रांतात भव्य ‘मराठी सिनेमा महोत्सव’ आयोजित केला जाईल, अशी घोषणाही त्यांनी यावेळी केली. नमन, खेळे, जाखडी आणि वहीगायन या लोककला प्रकारांना योजनेत समाविष्ट केल्याबद्दल शेलार यांचा रत्नागिरीत विशेष सत्कार करण्यात आला, त्याप्रसंगी ते बोलत होते.
कोकणी लोककलेचे संवर्धन आणि शासनाचे आभार
महाराष्ट्राच्या समृद्ध लोक सांस्कृतिक वारशाचे जतन, संवर्धन आणि प्रसारासाठी शासनाने नमन, खेळे, जाखडी, वहीगायन आणि झाडीपट्टी या लोककला प्रकारांचा समावेश लोककला अनुदान योजनेत केला आहे. या ऐतिहासिक निर्णयाबद्दल शासनाचे आभार मानण्यासाठी ‘नमन लोककला रत्नागिरी जिल्हा मातृसंस्था’ तसेच विविध स्थानिक लोककला संघटनांच्या वतीने रत्नागिरीत एका भव्य कार्यक्रमाचे आयोजन करण्यात आले होते. या कार्यक्रमात कोकणी लोककलेचे सादरीकरण पाहून सांस्कृतिकमंत्री आशिष शेलार भारावून गेले. कोकणी लोककलेला राजाश्रय देऊन त्याला योग्य दर्जा देण्याची संकल्पना आणि सातत्यपूर्ण पाठपुरावा उद्योगमंत्री तथा पालकमंत्री उदय सामंत यांनीच केला होता, असा विशेष उल्लेखही शेलार यांनी आपल्या भाषणात केला.
लोककलांना परदेशात व्यासपीठ मिळवून द्या: पालकमंत्री उदय सामंत
कार्यक्रमादरम्यान बोलताना जिल्ह्याचे पालकमंत्री उदय सामंत यांनी कोकणातील कलाकारांच्या वतीने सांस्कृतिकमंत्र्यांकडे काही महत्त्वाच्या मागण्या मांडल्या.
“कोकणातील जुनी आणि नवी पिढी आजही अत्यंत निष्ठेने लोककला जपत आहे. लोककला हे केवळ करमणुकीचे साधन नसून ते लोकजागृतीचे एक प्रभावी माध्यम आहे. जिल्ह्यातील अनेक जुनी नमन मंडळे अजूनही नोंदणीकृत नाहीत, त्यामुळे कोकणासाठी अनुदान देताना नियमांमध्ये काही अंशी शिथिलता आणून वेगळा नियम लावावा. तसेच, वृद्ध कलाकारांना देण्यात येणाऱ्या मानधनाची दरवर्षीची १०० कलावंतांची मर्यादा आता दुप्पट करावी. यासोबतच कोकणी लोककलांना आंतरराष्ट्रीय स्तरावर व परदेशात मोठे व्यासपीठ मिळवून देण्यासाठी शासनाने विशेष प्रयत्न करावेत,” अशी मागणी पालकमंत्री सामंत यांनी केली.
राजकीय आणि सामाजिक क्षेत्रातील दिग्गजांची उपस्थिती
या दिमाखदार सोहळ्याला रत्नागिरी जिल्ह्यातील अनेक प्रमुख लोकप्रतिनिधी आणि पदाधिकाऱ्यांनी हजेरी लावली होती. व्यासपीठावर पालकमंत्री उदय सामंत यांच्यासह लांजा-राजापूरचे आमदार किरण सामंत, आमदार प्रमोद जठार, जिल्हा परिषद अध्यक्षा अस्मिता केंद्ग्रे, उपाध्यक्ष विलास चाळके, नगराध्यक्ष शिल्पा सुर्वे उपस्थित होते. तसेच भाजपचे जिल्हाध्यक्ष प्रशांत यादव, शिंदे सेनेचे संपर्कप्रमुख राजेंद्र महाडिक आणि अभिनेते सुशांत शेलार आदी मान्यवर यावेळी उपस्थित होते. मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि उपमुख्यमंत्री सुनेत्रा पवार यांच्या नेतृत्वाखालील सरकार कोकणच्या कला आणि संस्कृतीला नेहमीच पाठबळ देत राहील, असा विश्वास याप्रसंगी व्यक्त करण्यात आला.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
18:02 17-07-2026
