रत्नागिरीतील गोळप येथील घटना
रत्नागिरी : तालुक्यातील गोळप-शिरंबाड येथून एक दुर्दैवी घटना समोर आली आहे. अज्ञात कारणावरून आंबा फवारणीचे विषारी औषध प्राशन केलेल्या एका ५४ वर्षीय प्रौढाचा उपचारादरम्यान जिल्हा शासकीय रुग्णालयात मृत्यू झाला आहे.
उलट्या अन् अस्वस्थता वाढल्याने रुग्णालयात दाखल
मिळालेल्या माहितीनुसार, दीपक भिकाजी घाणेकर (वय ५४, रा. गोळप-शिरंबाड, रत्नागिरी) असे मृत व्यक्तीचे नाव आहे. त्यांनी अज्ञात कारणावरून आंबा पिकावर फवारले जाणारे विषारी औषध प्राशन केले होते. औषधाचा अंमल सुरू झाल्यानंतर त्यांना तीव्र अस्वस्थता जाणवू लागली आणि उलट्यांचा त्रास सुरू झाला. ही बाब निदर्शनास येताच नातेवाईकांनी त्यांना तातडीने पुढील उपचारासाठी रत्नागिरीतील जिल्हा शासकीय रुग्णालयात दाखल केले.
उपचारादरम्यान प्राणज्योत मालवली
जिल्हा शासकीय रुग्णालयात त्यांच्यावर वैद्यकीय उपचार सुरू असतानाच त्यांची प्राणज्योत मालवली. तेथील वैद्यकीय अधिकाऱ्यांनी तपासून त्यांना मृत घोषित केले. सोमवारी (२८ सप्टेंबर) दुपारी एकच्या सुमारास ही घटना घडली. या दुर्दैवी घटनेची नोंद जिल्हा शासकीय रुग्णालयाच्या पोलीस चौकीत करण्यात आली असून, पोलीस पुढील कायदेशीर तपास करत आहेत.
