‘द अॅटोमिक हॅबिट्स’चा संदर्भ देत जिल्हाधिकारी मनुज जिंदल यांनी दिला विद्यार्थ्यांना यशाचा मंत्र; २३ नामांकित कंपन्यांचा सहभाग
रत्नागिरी : रत्नागिरीतील गोगटे जोगळेकर महाविद्यालयात एक भव्य आणि प्रेरणादायी कार्यक्रम पार पडला. जिल्हा कौशल्य विकास, रोजगार व उद्योजकता मार्गदर्शन केंद्र आणि गोगटे जोगळेकर महाविद्यालय यांच्या संयुक्त विद्यमाने आयोजित ‘पंडित दीनदयाल उपाध्याय रोजगार महाकुंभा’चे उद्घाटन रत्नागिरीचे जिल्हाधिकारी मनुज जिंदल यांच्या हस्ते करण्यात आले. या रोजगार मेळाव्यात २३ नामांकित कंपन्यांच्या प्रतिनिधींनी सहभाग नोंदवून हजारो तरुण-तरुणींना रोजगाराची आणि संवादाची थेट संधी उपलब्ध करून दिली.
"केवळ पदवी उपयोगाची नाही; दररोज १% प्रगती करा" – जिल्हाधिकारी मनुज जिंदल
कृत्रिम बुद्धिमत्ता (AI) आणि वेगाने बदलणाऱ्या तंत्रज्ञानाच्या युगात केवळ पदवी उपयोगाची नसून ‘स्कील’ (कौशल्य) हेच खरे भविष्य ठरणार असल्याचे प्रतिपादन जिल्हाधिकारी मनुज जिंदल यांनी केले. स्वतःच्या जीवनप्रवासाचे उदाहरण देत ते म्हणाले की, "एका छोट्या गावातील हिंदी माध्यमातून शिक्षण झाल्यानंतर इंग्रजीत जुळवून घेताना सुरुवातीला अपयश आले, मात्र चिकाटी आणि शिस्तीच्या जोरावर मी पुढे गेलो." ‘द अॅटोमिक हॅबिट्स’ या प्रसिद्ध पुस्तकाचा संदर्भ देत त्यांनी दररोज १ टक्का प्रगती करून चक्रवाढ पद्धतीने यश मिळवण्याचा मंत्र विद्यार्थ्यांना दिला.
केवळ नोकरी शोधणारे नका बनू, ‘जॉब क्रिएटर’ व्हा; प्राचार्य डॉ. मकरंद साखळकर यांचे आवाहन
कार्यक्रमाचे अध्यक्ष आणि गोगटे जोगळेकर महाविद्यालयाचे प्राचार्य डॉ. मकरंद साखळकर यांनी विद्यार्थ्यांना ‘जॉब सीकर’ न राहता ‘जॉब क्रिएटर’ (नोकरी देणारे उद्योजक) बनण्याचे आवाहन केले. ‘आत्मनिर्भर भारत’ आणि ‘विकसित भारत’ घडवण्यासाठी तरुणांमधील कल्पकता आणि उद्योजक वृत्ती महत्त्वाची असल्याचे त्यांनी सांगितले. हा मेळावा पंतप्रधान नरेंद्र मोदी यांच्या वाढदिवसानिमित्त देशभरात राबवल्या जाणाऱ्या सेवा, विकास आणि युवा सक्षमीकरण उपक्रमाचाच एक भाग म्हणून आयोजित करण्यात आला होता.
शासकीय कर्ज योजनांचा लाभ घेण्याचे आवाहन
तरुणांना नवीन उद्योग-व्यवसाय सुरू करण्यासाठी भांडवलाची अडचण भासू नये म्हणून शासनाच्या CMEGP आणि PMEGP यांसारख्या कर्ज व अनुदान योजना उपलब्ध आहेत. तरुणांनी सोशल मीडिया आणि इंटरनेटचा सकारात्मक वापर करून आपली कौशल्ये अपडेट करावीत आणि उद्योजकतेकडे पाऊल टाकावे, असा मोलाचा सल्ला जिल्हाधिकाऱ्यांनी दिला.
