ग्रामीण भागातील महिला आणि ज्येष्ठ नागरिकांची नोंदणी अपूर्ण असल्याने महामंडळाचा निर्णय; ३१ डिसेंबर २०२६ पर्यंत स्मार्ट कार्ड नसतानाही मिळणार प्रवास सवलत.
मुंबई: महाराष्ट्र राज्य मार्ग परिवहन महामंडळाकडून (एसटी) महिला, ज्येष्ठ नागरिक आणि अमृत ज्येष्ठ नागरिकांना प्रवास सवलतीचा सुलभ, पारदर्शक व प्रभावीपणे लाभ मिळावा यासाठी ST Bus NCMC Card (नॅशनल कॉमन मोबिलिटी कार्ड) देण्याची प्रक्रिया राबवली जात आहे. दरम्यान, या सवलतींसाठी एनसीएमसी स्मार्ट कार्ड अनिवार्य करण्याच्या निर्णयाला आता १ जानेवारी २०२७ पर्यंत मुदतवाढ देण्यात आली आहे. एसटी महामंडळाचे अध्यक्ष तथा राज्याचे परिवहन मंत्री प्रताप सरनाईक यांनी यासंदर्भातील महत्त्वपूर्ण माहिती दिली.
ग्रामीण भागातील महिलांसाठी विशेष नोंदणी शिबिरे
एसटी महामंडळाने महिला आणि ज्येष्ठ नागरिकांसाठी १ ऑक्टोबर २०२६ पासून एनसीएमसी स्मार्ट कार्ड अनिवार्य केले होते. आतापर्यंत राज्यभरात सुमारे १ कोटी १० लाख कार्डांची नोंदणी आणि वितरण पूर्ण झाले आहे. मात्र, ग्रामीण भागातील अनेक महिला लाभार्थ्यांपर्यंत या योजनेची पुरेशी माहिती न पोहोचल्याने त्या अद्याप या कार्डपासून वंचित असल्याचे निदर्शनास आले. ही अडचण विचारात घेऊन महामंडळाने आता थेट ग्रामपंचायत स्तरावर विशेष नोंदणी शिबिरे आयोजित करण्याचा निर्णय घेतला आहे. या मोहिमेद्वारे ३१ डिसेंबर २०२६ पर्यंत राज्यातील १०० टक्के पात्र लाभार्थ्यांपर्यंत कार्ड पोहोचवण्याचे उद्दिष्ट ठेवण्यात आले आहे.
मुदतवाढीमुळे प्रवाशांना मोठा दिलासा
सामाजिक संघटना, लोकप्रतिनिधी आणि राजकीय नेत्यांनी केलेल्या मागण्यांचा सकारात्मक विचार करून महामंडळाने कार्ड अनिवार्यतेची मुदत वाढवली आहे. यामुळे ७ नोव्हेंबर २०२६ ते ३१ डिसेंबर २०२६ या कालावधीत एनसीएमसी स्मार्ट कार्ड नसले तरीही महिला व ज्येष्ठ नागरिकांना एसटी प्रवासातील सवलतींचा नेहमीप्रमाणे लाभ घेता येणार आहे. कोणत्याही पात्र प्रवाशाची अडचण होऊ नये म्हणून ही सवलत कायम ठेवण्यात आली आहे.
मंत्री प्रताप सरनाईक यांचे सहकार्याचे आवाहन
सर्व पात्र महिला आणि ज्येष्ठ नागरिकांनी या वाढीव कालावधीत आपले एसटी स्मार्ट कार्ड नोंदवून घ्यावे, असे आवाहन परिवहन मंत्री प्रताप सरनाईक यांनी केले आहे. ग्रामपंचायत स्तरावर होणाऱ्या या विशेष मोहिमेत स्थानिक लोकप्रतिनिधी, प्रवासी संघटना व नागरिकांनी सक्रिय सहभाग नोंदवून योजना यशस्वी करावी, असेही त्यांनी स्पष्ट केले.
