फटाक्यांची आतषबाजी आणि बाजारपेठेत उत्साह
Ratnagiri Diwali celebration च्या निमित्ताने यंदा कोकणातील रत्नागिरी जिल्ह्यात दिवाळीचा सण अत्यंत उत्साहात आणि जलोषात साजरा करण्यात आला. रविवारी (दि. ८) नरक चतुर्दशी आणि लक्ष्मीपूजन एकाच दिवशी आल्यामुळे जिल्ह्यातील नागरिकांमध्ये मोठा उत्साह पाहायला मिळाला. रविवारी पहाटेपासूनच घरोघरी सुगंधी उटणे व तेल लावून अभ्यंगस्नान करण्यात आले, अंगणात रंगोळ्या आणि दारात तोरणे, आकाशकंदील लावून घरे सजावण्यात आली होती. लहान मुलांनी पहाटेच कारिट फोडून नरकासुराचा वध साजरा केला, तर फटाक्यांच्या आवाजाने आणि पणत्यांच्या उजेडाने संपूर्ण कोकण दणाणून गेले.
जिल्ह्यातील प्रमुख मंदिरांमध्ये पहाटेपासूनच भाविकांची मोठी गर्दी झाली होती. गणपतीपुळे, मार्लेश्वर, व्याडेश्वर, केशवराज, परशुराम मंदिरात दर्शनासाठी भाविकांच्या रांगा लागल्या होत्या. याशिवाय गणपतीपुळे, दापोली, गुहागर, आरे-वारे येथे पर्यटकांनी दिवाळी साजरा करण्यासाठी विशेष गर्दी केल्याने येथील लॉज व हॉटेल हाऊसफुल्ल झाले होते.
Ratnagiri Diwali celebration: घरोघरी लक्ष्मीची आणि कुबेराची आराधना
रविवारच्या संध्याकाळी रत्नागिरी जिल्ह्यात घरोघरी लक्ष्मीपूजन उत्साहात संपन्न झाले. महिलांनी पारंपरिक वेशभूषेत लक्ष्मीची मनोभावे पूजा केली, ज्यामध्ये कमळ, झेंडू, शेवंती, आंब्याची पाने आणि केळीचे खांब वापरून घर सजवण्यात आले होते. लक्ष्मीसमोर धणे-गुळ, लाह्या, बत्तासे व फराळाचा नैवेद्य दाखवण्यात आला. व्यापाऱ्यांनी दुकाने व कार्यालयांत चोपडा पूजन आणि कुबेरपूजन केले. सराफ बाजार तसेच कापड बाजारात लक्ष्मीपूजनाच्या दिवशी खरेदीसाठी मोठी गर्दी पाहायला मिळाली.
बाजारपेठेत उसळली प्रचंड गर्दी; सोन्या-चांदी ते वाहनांची बुकिंग
दिवाळीनिमित्त रत्नागिरी शहरातील मारुती मंदिर, टिळक आळी व माळनाका परिसरात खरेदीसाठी प्रचंड गर्दी झाली होती. रत्नागिरी शहर तसेच जिल्ह्यातील बाजारपेठेत रत्नागिरीकरांनी उत्स्फूर्त खरेदी केली. मंगळवारी पाडवा आणि बुधवारी भाऊबीज असल्यामुळे नागरिकांनी आधीपासूनच जय्यत तयारी केली असून, सोन्या-चांदीचे दागिने, वाहन, घर आणि प्लॉट्सची बुकिंग मोठ्या प्रमाणात करण्यात आली आहे. बाजारपेठेतील व्यापाऱ्यांनी आपल्या दुकानांसमोर विद्युत रोषणाई करून लक्ष्मी मातेचे पूजन केले आणि जोरदार फटाक्यांची आतषबाजी केली, ज्यामुळे संपूर्ण बाजारपेठ उजळून निघाली होती.
