रत्नागिरी – राज्यभरात सुरू असलेल्या कथित भ्रष्ट आणि असंवेदनशील सरकारविरोधात आज शिवसेना (उद्धव बाळासाहेब ठाकरे) पक्षाने तीव्र आंदोलन केले. उद्धव बाळासाहेब ठाकरे यांच्या नेतृत्वाखालील शिवसेनेने राज्यातील प्रत्येक जिल्ह्याच्या जिल्हाधिकारी कार्यालयासमोर निदर्शने केली. रत्नागिरीतही आज सकाळी ११ वाजता उबाठा गटाच्या शिवसैनिकांनी जिल्हाधिकारी कार्यालयासमोर एकत्र येत जोरदार घोषणाबाजी करत राज्य सरकारचा निषेध केला.
या आंदोलनात कार्यकर्त्यांनी सत्ताधारी नेत्यांच्या अनेक वादग्रस्त विधानांवर आणि कथित घोटाळ्यांवर टीका केली. यावेळी, “सरकारचा पैसा आहे, आपल्या बापाचे काय जाते?” असे वादग्रस्त विधान करणाऱ्या समाजकल्याण मंत्र्यांवर कारवाई न झाल्याबद्दल तीव्र संताप व्यक्त करण्यात आला. तसेच, “हे सरकार भिकारी आहे,” असे म्हणणाऱ्या मंत्र्यांनाही मंत्रिमंडळात कायम ठेवल्याचा निषेध करण्यात आला.
मंत्र्यांच्या गैरव्यवहारावर प्रश्नचिन्ह
आंदोलकांनी सत्ताधारी मंत्र्यांच्या अनेक कथित गैरव्यवहारांची यादीच सादर केली. यामध्ये समाजकल्याण मंत्री श्री. संजय शिरसाट यांच्यावर ६० कोटींचा घोटाळा आणि १५०० कोटींच्या गैरव्यवहाराचे आरोप करण्यात आले. त्याचप्रमाणे, कृषीमंत्री असताना रमी खेळणारे श्री. माणिकराव कोकाटे आणि नुकसानग्रस्त शेतकऱ्यांबद्दल बोलताना “ढेकळांचे पंचनामे करायचे का?” असे असंवेदनशील विधान करणाऱ्या मंत्र्यांचाही निषेध करण्यात आला.
शिवाय, गृहराज्यमंत्री श्री. योगेश कदम यांच्या मातोश्रीच्या नावे डान्सबार असल्याचा मुद्दाही यावेळी उपस्थित करण्यात आला. यासोबतच, सत्ताधारी मंत्र्यांचे आणि अधिकाऱ्यांचे हनीट्रॅप प्रकरणदेखील आंदोलनादरम्यान चर्चेत होते.
शिवसेनेच्या (उद्धव बाळासाहेब ठाकरे) या आंदोलनाने राज्य सरकारला थेट आव्हान दिले असून, सरकारमधील मंत्र्यांच्या कथित गैरव्यवहारावर आणि असंवेदनशीलतेवर त्यांनी जोरदार टीका केली आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
15:10 11-08-2025
