रत्नागिरी, दि. २ (प्रतिनिधी) : आगामी रत्नागिरी नगरपरिषद निवडणुकीच्या (Ratnagiri Municipal Election) पार्श्वभूमीवर शिवसेना (उद्धव बाळासाहेब ठाकरे) पक्षाने ‘रत्नागिरी शहर परिवर्तन पदयात्रे’च्या (Ratnagiri Shahar Parivartan Padayatra) माध्यमातून जनसंपर्क मोहीम सुरू केली आहे. पक्षाचे उपनेते व माजी आमदार बाळ माने (Bal Mane) यांच्या नेतृत्वाखाली आज (रविवार, दि. २) या पदयात्रेला उत्साहात प्रारंभ झाला. रत्नागिरीचे ग्रामदैवत श्री देव भैरीच्या दर्शनाने यात्रेचा शुभारंभ करण्यात आला.
नगरपरिषद निवडणूक जाहीर होण्यापूर्वी रत्नागिरी शहरातील विविध समस्यांकडे लोकांचे लक्ष वेधणे आणि पक्षाची भूमिका नागरिकांपर्यंत पोहोचवणे, हा या उपक्रमामागील मुख्य उद्देश आहे.
‘विकासासाठी आशीर्वाद द्या’ – बाळ माने
या प्रसंगी नागरिकांशी संवाद साधताना उपनेते बाळ माने यांनी पक्षाची भूमिका स्पष्ट केली. ते म्हणाले, “रत्नागिरीच्या विकासासाठी आणि नागरिकांच्या प्रश्नांच्या समाधानासाठी शिवसेना उद्धव बाळासाहेब ठाकरे पक्ष व महाविकास आघाडी कटिबद्ध आहे. आगामी नगरपरिषद निवडणुकीत रत्नागिरीकरांनी या पक्षाला आपला आशीर्वाद द्यावा,” असे भावनिक आवाहन त्यांनी केले.
दोन सत्रात शहर पिंजून काढले
पदयात्रेने दोन सत्रांमध्ये रत्नागिरी शहरातील विविध प्रभागांमधून प्रवास केला:
- पहिले सत्र: पहिल्या सत्राची सुरुवात भगवती मंदिर येथून झाली. हा मार्ग दत्त मंदिर किल्ला, मारुती मंदिर पठाणवाडी किल्ला, सांब मंदिर किल्ला, भाटकर वाडा, ज्योतिबा मंदिर, राम मंदिर, सरकार वाडी मार्गे भैरी मंदिर येथे सांगता करण्यात आला.
- सायंकाळचे सत्र: सायंकाळच्या सत्रात पदयात्रा विठ्ठल मंदिर भडंग नाका येथून निघाली. पुढे सदानंद वाडी, मांडवी मंदिर, मांडवी बीच हनुमान मंदिर, मांडवी नाका, दत्त मंदिर गुढे वठार, चवंडे वठार, तेली आळी, संत तुकडोजी महाराज मंदिर, राम मंदिर मार्गे रत्नागिरी बसस्थानक येथे या सत्राची सांगता झाली.
कार्यकर्त्यांचा उत्स्फूर्त प्रतिसाद, भगवे वातावरण
शहरातील प्रभाग क्रमांक 10, 11, 14 आणि 15 मधून निघालेल्या या पदयात्रेला शिवसेना (उबाठा) पदाधिकारी आणि कार्यकर्त्यांचा मोठा प्रतिसाद लाभला. शहरभर भगवे झेंडे आणि घोषणांनी वातावरण भारावून गेले होते. पदयात्रेदरम्यान नागरिकांनी ठिकठिकाणी कार्यकर्त्यांचे उत्स्फूर्त स्वागत केले.
या पदयात्रेत शहरप्रमुख प्रशांत साळुंखे, उपशहरप्रमुख नितीन तळेकर, सलील डाफळे, शहर संघटक प्रसाद सावंत, विभागप्रमुख अमित खडसोडे, राजन शेट्टे, प्रशांत सुर्वे, राजाराम रहाटे, रोहित मयेकर, प्रकाश गुरव, माजी नगरसेविका रशिदा गोदड, राजश्री शिवलकर, सेजल बोराटे, उन्नती कोळेकर, विजया घुडे, पुजा जाधव, रमीजा तांडेल, सालिया वस्ता, स्मिता काटकर, शिरधनकर मॅडम, मयेकर मॅडम, दिलावर गोदड, बाबू बंदरकर, राजू सुर्वे, साजिद पावसकर, मुद्दसर तांडेल, बिपीन शिवलकर यांच्यासह अनेक पदाधिकारी व कार्यकर्ते मोठ्या संख्येने सहभागी झाले होते.
आगामी निवडणुकीच्या पार्श्वभूमीवर शिवसेनेच्या या जनसंपर्क मोहिमेचा हा एक महत्त्वपूर्ण टप्पा मानला जात आहे.
