रत्नागिरी: एसटी महामंडळाने प्रवाशांवर लादलेला अन्यायकारक ‘स्वच्छता अधिभार’, अवाढव्य भाडेवाढ आणि बस स्थानकांवरील मूलभूत सुविधांचा अभाव यांविरोधात शिवसेना (उद्धव बाळासाहेब ठाकरे) पक्षाने आक्रमक पवित्रा घेतला आहे. रत्नागिरी जिल्हाप्रमुख श्री. दत्ता कदम यांच्या मार्गदर्शनाखाली मंगळवारी एसटी विभागाला मागण्यांचे निवेदन सादर करून, मागण्या मान्य न झाल्यास ‘शिवसेना स्टाईल’ने आंदोलन करण्याचा कडक इशारा देण्यात आला आहे.
‘स्वच्छता करा’च्या नावाखाली प्रवाशांची लूट?
प्रवाशांच्या प्रत्येक तिकिटावर २ रुपये ‘स्वच्छता अधिभार’ (Cleaning Surcharge) लावण्याचा निर्णय महामंडळाने घेतला आहे. यावर शिवसेनेने तीव्र आक्षेप घेतला असून, स्थानके स्वच्छ ठेवणे हे महामंडळाचे कर्तव्य आहे, त्यासाठी प्रवाशांकडून अतिरिक्त पैसे वसूल करणे हा अन्याय असल्याचे निवेदनात म्हटले आहे. हा कर तात्काळ रद्द करण्याची मागणी युवासेना जिल्हाप्रमुख श्री. प्रसाद सावंत यांनी लावून धरली.
ज्येष्ठ नागरिकांच्या सवलतीवर गदा
१५ एप्रिलपासून लागू झालेल्या नवीन दरवाढीमुळे ज्येष्ठ नागरिकांच्या मोफत प्रवासाच्या सवलतीत तांत्रिक अडचणी निर्माण झाल्या आहेत. कोणतीही अट न ठेवता ज्येष्ठ नागरिकांना मिळणारी ही सवलत पूर्ववत करावी, अशी मागणी यावेळी करण्यात आली. सुविधांच्या नावाने शून्य आणि दरवाढीत मात्र महामंडळ पुढे, अशा शब्दांत पदाधिकाऱ्यांनी संताप व्यक्त केला.
भाडेवाढ १०%, पण सुविधा कुठे आहेत?
शिवसेनेने निवेदनात एसटी स्थानकांवरील भीषण वास्तवाकडे लक्ष वेधले आहे:
- पिण्याचे पाणी नाही: १०% भाडेवाढ करूनही स्थानकांवर शुद्ध पिण्याचे पाणी उपलब्ध नाही.
- बसेसची दयनीय अवस्था: अनेक गाड्यांची अवस्था अत्यंत वाईट असून त्या वेळेवर सुटत नाहीत.
- प्रवाशांची गैरसोय: बस स्थानकांवर मूलभूत सोयी-सुविधांचा बोजवारा उडाला आहे.
‘शिवसेना स्टाईल’ आंदोलनाचा इशारा
प्रशासनाने या मागण्यांची दखल न घेतल्यास संपूर्ण रत्नागिरी जिल्ह्यात तीव्र जनआंदोलन छेडले जाईल. “या आंदोलनामुळे कायदा व सुव्यवस्थेचा प्रश्न निर्माण झाल्यास त्यास सर्वस्वी एसटी प्रशासन जबाबदार राहील,” असा स्पष्ट इशारा देण्यात आला आहे.
हे निवेदन सादर करतेवेळी युवासेना जिल्हाप्रमुख श्री. प्रसाद सावंत, तालुका प्रमुख संदेश नारगुडे, उपतालुका प्रमुख रितेश लोखंडे व मोठ्या संख्येने शिवसैनिक उपस्थित होते.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
09:16 13-05-2026
