दापोलीत मुसळ’धार’: पंचनदी धरण पूर्ण क्षमतेने भरले, नियंत्रित विसर्ग सुरू

दापोली: दापोली तालुक्यात गेल्या २४ तासांपासून सुरू असलेल्या मुसळधार आणि संततधार पावसामुळे पंचनदी धरण पूर्ण क्षमतेने भरले आहे. धरणाची पाणीपातळी कमाल मर्यादेला पोहोचल्यामुळे प्रशासनाकडून धरणातून नियंत्रित पद्धतीने पाण्याचा विसर्ग सुरू करण्यात आला आहे. धरण ओसंडून वाहू लागल्याने परिसरातील शेतकरी आणि नागरिकांमध्ये समाधानाचे वातावरण असले, तरी नदीकाठच्या गावांना खबरदारीचा इशारा देण्यात आला आहे.

गेल्या २४ तासांत दापोली तालुक्यात सरासरी १३०.५७ मिमी पावसाची नोंद झाली असून, चालू पावसाळी हंगामातील एकूण पर्जन्यमान आता ३७८.६४ मिमी इतके झाले आहे.

महसूल मंडळनिहाय पावसाची आकडेवारी

तालुक्यातील सर्वच महसूल मंडळांमध्ये मुसळधार पाऊस झाला असून सातही केंद्रांची मिळून एकूण ९१४ मिमी पावसाची नोंद झाली आहे. यामध्ये वेळवी खोऱ्यात सर्वाधिक २०० मिमी, तर बुरोंडी केंद्रात सर्वात कमी ३१ मिमी पावसाची नोंद झाली.

नद्या-नाले दुथडी भरून वाहू लागले; सखल भागात पाणी साचले

सततच्या पावसामुळे धरणाच्या पाणलोट क्षेत्रातून मोठ्या प्रमाणात पाण्याची आवक सुरूच आहे. यामुळे दापोली तालुक्यातील प्रमुख नद्या, नाले आणि ओढे दुथडी भरून वाहत आहेत. काही सखल भागांमध्ये पाणी साचण्यास सुरुवात झाली असून, पावसाचा जोर असाच कायम राहिल्यास धरणातून होणाऱ्या पाण्याच्या विसर्गात आणखी वाढ होण्याची शक्यता प्रशासनाने व्यक्त केली आहे.

मुसळधार पावसामुळे तालुक्यातील सर्वच जलस्रोत वेगाने भरत आहेत. भातलावणी आणि पिण्याच्या पाण्याच्या दृष्टीने ही अत्यंत दिलासादायक बाब मानली जात आहे.

प्रशासकीय आवाहन: मुसळधार पावसाची स्थिती पाहता नदीकाठच्या तसेच सखल भागातील नागरिकांनी सतर्क राहावे आणि प्रशासनाच्या सूचनांचे काटेकोर पालन करावे. नागरिकांनी अनावश्यकपणे नदी-नाल्यांच्या परिसरात जाणे टाळावे, असे आवाहन दापोली तालुका प्रशासनाकडून करण्यात आले आहे.

दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
16:02 30-06-2026