रत्नागिरी: रत्नागिरी जिल्ह्यातील पोस्टल ग्राहकांसाठी आणि प्रशासकीय कामांसाठी एक अत्यंत महत्त्वाची व आनंदाची बातमी समोर आली आहे. डाक निदेशालय, नवी दिल्ली यांच्या अधिकृत मंजुरीनुसार, पोस्टाचा स्वतंत्र ‘चिपळूण विभाग’ बुधवार, दिनांक १ जुलै २०२६ पासून नव्याने कार्यरत होत आहे. या नवीन चिपळूण विभागाचा भव्य शुभारंभ १ जुलै रोजी सकाळी १० वाजता आयोजित करण्यात आला असल्याची अधिकृत माहिती रत्नागिरीचे डाकघर अधीक्षक ज्ञानेश कुलकर्णी यांनी दिली आहे.
या नवीन विभागाच्या निर्मितीमुळे उत्तर रत्नागिरीतील नागरिकांना विभागीय स्तरावरील कामांसाठी आता जिल्हा मुख्यालयात येण्याची आवश्यकता भासणार नाही.
उत्तर रत्नागिरीतील ‘या’ ५ तालुक्यांचा समावेश
सध्या रत्नागिरी जिल्ह्यातील एकूण ९ तालुक्यांपैकी उत्तर रत्नागिरी विभागातील खालील ५ तालुक्यांचा कार्यभार या नवीन चिपळूण पोस्ट विभागाकडे सोपवण्यात आला आहे:
- चिपळूण
- दापोली
- खेड
- गुहागर
- मंडणगड
या पाचही तालुक्यांमधील सर्व मुख्य आणि उप-डाकघरे (Post Offices) आता नव्याने निर्माण होणाऱ्या चिपळूण विभागाला थेट जोडण्यात येणार आहेत.
अवाढव्य विस्तारामुळे प्रशासकीय कामात येत होत्या अडचणी
सध्याच्या रत्नागिरी डाक विभागाचा भौगोलिक विस्तार दक्षिण रत्नागिरीतील राजापूरपासून ते थेट उत्तर सरहद्दीवरील वेशवीसारख्या अत्यंत दुर्गम भागांपर्यंत पसरलेला आहे. या अवाढव्य आणि विस्तीर्ण क्षेत्रफळामुळे प्रशासकीय नियंत्रण ठेवताना आणि कामकाजाचा ताळमेळ बसवताना डाक विभागाला अनेक अडचणींचा सामना करावा लागत होता.
याशिवाय, ग्राहकांना देखील त्यांच्या विभागीय स्तरावरील (Divisional Level) महत्त्वाच्या कामांसाठी शेकडो किलोमीटरचा प्रवास करून थेट रत्नागिरी जिल्हा मुख्यालयात यावे लागत असे. आता चिपळूण विभाग स्वतंत्र आणि स्वायत्त झाल्यामुळे उत्तर रत्नागिरीतील लाखो नागरिकांचा वेळ, पैसा आणि श्रम वाचणार असून टपाल सेवा अधिक जलद व लोकाभिमुख होण्यास मदत होणार आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
16:29 30-06-2026
