नैसर्गिक ओढ्याचे पाणी दूषित; ग्रामस्थांच्या ठिय्या आंदोलनानंतर प्रशासनाची मोठी कारवाई
खेड: Lote MIDC Pollution म्हणजेच खेड तालुक्यातील लोटे औद्योगिक वसाहतीतील रासायनिक प्रदूषणाचा गंभीर प्रश्न पुन्हा एकदा ऐरणीवर आला आहे. औद्योगिक वसाहतीतील एका चेंबरमधून मोठ्या प्रमाणात रासायनिक गळती झाल्याची घटना समोर आली आहे. हे धोकादायक रसायन नैसर्गिक ओढ्याद्वारे स्थानिक शेतजमिनीत आणि पुढे थेट नदीच्या पात्रात वाहून गेल्याचा दावा परिसरातील ग्रामस्थांनी केला आहे. या प्रकारामुळे संतप्त झालेल्या नागरिकांनी लोटे औद्योगिक वसाहतीतील पोलिस दूरक्षेत्र कार्यालयासमोर ठिय्या आंदोलन करत प्रशासनाला जाब विचारला.
‘या’ ६ बड्या कारखान्यांना उत्पादनबंदीच्या नोटिसा
ग्रामस्थांच्या तीव्र आक्षेपानंतर आणि तक्रारीची गंभीर दखल घेत महाराष्ट्र औद्योगिक विकास महामंडळाने (एमआयडीसी) प्राथमिक पातळीवर मोठी कारवाई केली आहे. प्रदूषण नियंत्रण मंडळाच्या समन्वयाने वसाहतीतील प्रमुख ६ कारखान्यांना तात्काळ उत्पादनबंदीच्या नोटिसा बजावण्यात आल्या आहेत. यामध्ये खालील कंपन्यांचा समावेश आहे:
१. सुप्रिया लाइफ सायन्स (Supriya Lifescience) २. स्पॅक कंपनी (Spac Company) ३. विनंती ग्रो (Vinanti Grow) ४. अक्वीला कंपनी (Aquila Company) ५. लक्ष्मी ऑरगॅनिक (Lakshmi Organic) ६. एसएमडी स्पेशालिटी (SMD Specialty)
सध्या या सर्व कारखान्यांमधून प्रदूषणास कारणीभूत ठरणार्या घटकांची आणि यंत्रणेची सखोल तांत्रिक तपासणी सुरू असल्याची माहिती अधिकृत सूत्रांनी दिली आहे.
महिला ग्रामस्थ आक्रमक; पोलिसांत लेखी तक्रार दाखल
घटनेची माहिती मिळताच सोनगावातील महिला ग्रामस्थ कांचन चाळके (माजी सैनिक), शीतल जाधव आणि संजना घाग यांनी घटनास्थळी धाव घेतली. या रासायनिक प्रदूषणामुळे परिसरातील पर्यावरण, स्थानिक शेती आणि नागरिकांच्या आरोग्याला गंभीर धोका निर्माण झाल्याचा आरोप त्यांनी केला आहे.
ग्रामस्थांनी महाराष्ट्र प्रदूषण नियंत्रण मंडळ (MPCB) आणि एमआयडीसीच्या अधिकाऱ्यांना प्रत्यक्ष घटनास्थळी बोलावून रसायनांच्या विसर्गाबाबत जाब विचारला. याप्रकरणी दोषींवर फौजदारी व कठोर कारवाई व्हावी, यासाठी लोटे औद्योगिक वसाहतीतील पोलिस दूरक्षेत्र कार्यालयात एक लेखी तक्रारही दाखल करण्यात आली आहे.
केवळ कागदी नोटिसा नकोत; प्रभावी अंमलबजावणीची मागणी
लोटे एमआयडीसीमधील प्रदूषणाचा आणि रासायनिक सांडपाणी उघड्यावर सोडण्याचा प्रश्न यापूर्वीही अनेकदा ऐरणीवर आला आहे. दरवेळी प्रशासनाकडून केवळ नोटिसा दिल्या जातात, असा अनुभव असल्याने यावेळी ग्रामस्थ अधिक आक्रमक झाले आहेत. प्रशासनाने बजावलेल्या या उत्पादनबंदीच्या नोटिसांची केवळ कागदावर अंमलबजावणी न राहता, दोषी कारखान्यांवर कायमस्वरूपी व ठोस कारवाई व्हावी, अशी ठाम भूमिका स्थानिक नागरिकांनी घेतली आहे. आता एमआयडीसी प्रशासन आणि प्रदूषण नियंत्रण मंडळ पुढे कोणती पावले उचलते, याकडे संपूर्ण खेड तालुक्याचे लक्ष लागले आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
10:43 09-07-2026
