१९ दिवसांत ९ किलो वजन घटले; दररोज वैद्यकीय तपासणी करण्याचे न्यायालयाचे आदेश
नवी दिल्ली: ‘Sonam Wangchuk Hunger Strike’ (सोनम वांगचुक यांचे उपोषण) या संदर्भात दिल्ली उच्च न्यायालयाने एक अत्यंत महत्त्वपूर्ण पाऊल उचलले आहे. नीट (NEET) परीक्षेतील घोटाळ्यानंतर केंद्रीय शिक्षण मंत्री धर्मेंद्र प्रधान यांच्या राजीनाम्याच्या मागणीसाठी अनिश्चितकालीन उपोषणावर बसलेले प्रसिद्ध सामाजिक कार्यकर्ते सोनम वांगचुक यांच्या ढासळत्या प्रकृतीची न्यायालयाने गंभीर दखल घेतली आहे. सुनावणी दरम्यान, “प्रत्येक नागरिकाचे जीवन मौल्यवान आहे आणि त्याचे संरक्षण करण्यासाठी सर्वतोपरी प्रयत्न करणे ही सरकारची जबाबदारी आहे,” अशी टिप्पणी करत उच्च न्यायालयाने केंद्र सरकारला वांगचुक यांच्या प्रकृतीबाबत तातडीचे निर्देश दिले आहेत.
या जनहित याचिकेवर न्यायमूर्ती डी. के. उपाध्याय आणि न्यायमूर्ती तेजस कारिया यांच्या खंडपीठासमोर गुरुवारी, १६ जुलै २०२६ रोजी सुनावणी पार पडली. सोनम वांगचुक यांच्या आरोग्यावर नियमितपणे लक्ष ठेवण्यासाठी सरकारी डॉक्टरांनी त्यांची दररोज वैद्यकीय तपासणी करावी, असे आदेश कोर्टाने दिले आहेत. यावर केंद्र सरकारच्या वतीने न्यायालयाला आश्वस्त करण्यात आले की, त्यांच्या आरोग्याची दररोज काळजीपूर्वक तपासणी केली जात आहे.
याचिकाकर्ते राकेश कुमार सैनी यांनी दाखल केलेल्या या याचिकेत वांगचुक यांना तातडीने रुग्णालयात दाखल करण्याची मागणी केली आहे. केंद्र आणि दिल्ली सरकारला निर्देश देऊन वांगचुक यांना तातडीने जीव वाचवणारी काळजी, आपत्कालीन उपचार आणि आवश्यक पोषण पुरवण्याची विनंती करण्यात आली आहे. तसेच, परिस्थिती हाताबाहेर गेल्यास गरज पडल्यास त्यांना जबरदस्तीने अन्न भरवण्याची परवानगी द्यावी, असेही या याचिकेत नमूद करण्यात आले आहे.
‘कॉकरोच जनता पार्टी’च्या (सीजेपी) आंदोलनात सहभागी होऊन सोनम वांगचुक २० जूनपासून दिल्लीतील जंतर-मंतर येथे उपोषणाला बसले आहेत. आज त्यांच्या उपोषणाचा १९ वा दिवस आहे. केंद्रीय शिक्षण मंत्र्यांच्या राजीनाम्यासह परीक्षा पद्धतीत पारदर्शकता आणण्यासाठी त्यांचे हे आंदोलन सुरू आहे. सलग १९ दिवस अन्नत्याग केल्यामुळे अवघ्या १८ दिवसांत त्यांचे वजन ८.९ किलोने घटून आता ५७.१५ किलोवर आले आहे. ते पूर्णपणे शुद्धीवर असले तरी उपोषणाचा त्यांच्या अंतर्गत अवयवांवर आणि आरोग्यावर गंभीर परिणाम होत असल्याचे डॉक्टरांनी सांगितले आहे.
वांगचुक यांच्या या आंदोलनाचे पडसाद आता आंतरराष्ट्रीय स्तरावरही उमटू लागले आहेत. अमेरिकेतील ‘हिंदू फॉर ह्युमन राइट्स’ या संघटनेने वांगचुक यांच्या प्रकृतीबद्दल तीव्र चिंता व्यक्त करत पंतप्रधान नरेंद्र मोदी यांना थेट आवाहन केले आहे. त्यांनी आंदोलकांशी त्वरित संवाद साधून परीक्षा पद्धतीत उत्तरदायित्व सुनिश्चित करावे, अशी मागणी केली आहे. दुसरीकडे, सीजेपीचे संस्थापक अभिजीत दीपके यांनी सरकारवर तोफ डागत, सरकार जबाबदारी टाळत असून त्यांची वृत्ती क्रूर असल्याचा आरोप केला आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
13:00 16-07-2026
