पुढील वर्षापासून महिलांना रानभाजी व तृणधान्य आधारित उपहारगृह चालवण्याची मिळणार संधी; कृषी पुरस्कारप्राप्त शेतकऱ्यांचा गौरव
रत्नागिरी:
Wild Vegetables Research Ratnagiri 2026 उपक्रमांतर्गत आरोग्यासाठी अत्यंत गुणकारी असलेल्या रानभाज्या केवळ पावसाळ्यापुरत्या मर्यादित न राहता वर्षभर सर्वसामान्यांना उपलब्ध व्हाव्यात, यासाठी कोकण कृषी विद्यापीठाने विशेष संशोधन करावे आणि या प्रकल्पासाठी आवश्यक तो सर्व निधी राज्य शासनाकडून उपलब्ध करून दिला जाईल, अशी महत्त्वाची घोषणा राज्याचे उद्योगमंत्री तथा पालकमंत्री डॉ. उदय सामंत यांनी केली. कृषी विभाग आणि ‘आत्मा’ यंत्रणेच्या संयुक्त विद्यमाने रत्नागिरीतील हॉटेल विवेक देसाई बँक्वेट येथे आयोजित जिल्हास्तरीय रानभाजी व पौष्टिक तृणधान्य महोत्सवाच्या उद्घाटनप्रसंगी ते बोलत होते.
रानभाजी व तृणधान्य आधारित उपहारगृहाची अभिनव संकल्पना
महोत्सवातील स्टॉल्सची पाहणी करताना पालकमंत्र्यांनी महिलांनी तयार केलेल्या खाद्यपदार्थांचे भरभरून कौतुक केले. केवळ महोत्सवापुरते मर्यादित न राहता पुढील वर्षापासून महिलांना रानभाजी आणि पौष्टिक तृणधान्यांवर आधारित खाद्यपदार्थ उपलब्ध करून देणारे उपहारगृह (उपाहारगृह) चालवण्याची संधी देण्याचा निर्णय घेण्यात आला आहे. या प्रयोगामुळे महिलांना रोजगाराची नवी संधी मिळण्याबरोबरच रानभाज्यांना हक्काची बाजारपेठ उपलब्ध होईल, असा विश्वास त्यांनी व्यक्त केला.
वर्षभर रानभाज्या टिकवण्यासाठी संशोधनाच्या सूचना
स्टॉल पाहणीदरम्यान एका महिला शेतकाऱ्याने एका विशिष्ट रानभाजीचे मधुमेह नियंत्रणासाठी असलेले गुणधर्म पालकमंत्र्यांना सांगितले. यावर प्रतिक्रिया देताना, अशा गुणकारी रानभाज्यांवर प्रक्रिया करून त्या वर्षभर टिकवण्यासाठी कृषी विद्यापीठाने संशोधन करावे, अशी सूचना डॉ. उदय सामंत यांनी केली. शेतकऱ्यांनी पारंपरिक शेतीपुरते मर्यादित न राहता गटशेती आणि नावीन्यपूर्ण प्रयोगांकडे वळावे, तसेच स्थानिक कृषी उत्पादनांना बाजारपेठ मिळवून देण्यासाठी अशा उपक्रमांचा विस्तार करण्याची गरज त्यांनी प्रतिपादित केली.
कृषी पुरस्कारप्राप्त शेतकाऱ्यांचा सत्कार व अनुदान वाटप
या महोत्सवात पालकमंत्र्यांच्या हस्ते विविध क्षेत्रांत उल्लेखनीय कामगिरी करणाऱ्या शेतकऱ्यांचा सत्कार करण्यात आला:
- जिल्हास्तरीय भात पीक स्पर्धा: नागेश बने (प्रथम क्रमांक), संजय पाटोळे (द्वितीय क्रमांक)
- नाचणी पीक स्पर्धा: धाकटू गावकर (प्रथम क्रमांक)
- सिंधुरत्न समृद्ध योजनेअंतर्गत: आंबा बागायतदारांना मालवाहतुकीसाठी अनुदानाचे वाटप करण्यात आले.
कार्यक्रमातील प्रमुख उपस्थिती
या प्रसंगी आमदार किरण सामंत, जिल्हाधिकारी मनोज जिंदल, जिल्हा परिषद अध्यक्षा अस्मिता केंद्रे, उपाध्यक्ष विलास चाळके यांच्यासह विविध पदाधिकारी उपस्थित होते. जिल्हा अधीक्षक कृषी अधिकारी शिवकुमार सदाफुले यांनी प्रास्ताविक केले, तर ‘आत्मा’चे प्रकल्प संचालक विजय बेतीवार यांनी आभार मानले. या महोत्सवाला शेतकरी, महिला आणि विद्यार्थ्यांचा उदंड प्रतिसाद लाभला.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
11:44 17-08-2026
