रोख रक्कम लांबवण्याचा प्रयत्न निष्फळ
रत्नागिरी:
रत्नागिरी तालुक्यातील हातखंबा येथील स्टेट बँक ऑफ इंडियाच्या (SBI) शाखेतील एटीएम मशिन फोडून रोख रक्कम लांबवण्याचा प्रयत्न केल्याची एक धक्कादायक घटना उघडकीस आली आहे. या प्रकरणी रत्नागिरी ग्रामीण पोलीस ठाण्यात अज्ञात चोरट्याविरुद्ध गुन्हा दाखल करण्यात आला आहे.
पोलिसांकडून मिळालेल्या अधिकृत माहितीनुसार, हा प्रकार २५ ऑगस्ट २०२६ रोजी पहाटे २:३० ते ३:४५ वाजेच्या सुमारास घडला. स्टेट बँक ऑफ इंडियाच्या हातखंबा शाखेच्या शाखा व्यवस्थापक शितल रमाकांत शिंदे (वय ४५) या घरी असताना, बँकेतील सहकाऱ्यांनी त्यांना फोनवरून बँकेच्या इमारतीतील एटीएम मशिन अज्ञात चोरट्याने फोडल्याची माहिती दिली.
घटना घडल्याची माहिती मिळताच शाखा व्यवस्थापक शितल शिंदे यांनी तात्काळ बँक गाठून प्रत्यक्ष पाहणी केली. त्या वेळी अज्ञात आरोपीने एटीएम मशिनचे नुकसान करून त्यातील रोख रक्कम लांबवण्याचा प्रयत्न केल्याचे निष्पन्न झाले.
या प्रकरणी शाखा व्यवस्थापक शितल शिंदे यांनी दिलेल्या फिर्यादीवरून रत्नागिरी ग्रामीण पोलीस ठाण्यात आरोपीविरुद्ध भारतीय न्याय संहिता (BNS) २०२३ चे कलम ३३४(१) आणि ६२ अन्वये गुन्हा नोंदवण्यात आला आहे. एटीएम केंद्रातील सीसीटीव्ही फुटेज आणि इतर तांत्रिक बाबींच्या आधारे पोलीस अज्ञात चोरट्याचा शोध घेत असून, अधिक तपास सुरू आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
10:35 26-08-2026
