भुलेश्वर दुर्घटनेनंतर पालिका प्रशासनाची कडक नियमावली
मुंबईतील भुलेश्वर परिसरात गणेशमूर्तीच्या आगमनादरम्यान घडलेल्या भीषण दुर्घटनेची बृहन्मुंबई महानगरपालिकेने (BMC) अत्यंत गंभीर दखल घेतली आहे. आगामी गणेशोत्सवात मूर्तींचे सुरक्षित आगमन आणि विसर्जन सुनिश्चित करण्यासाठी पालिका प्रशासनाने महत्त्वाचे पाऊल उचलले असून, आता १ टनापेक्षा जास्त वजन असलेल्या मोठ्या गणेशमूर्तींसाठी ‘योग्यता प्रमाणपत्र’ म्हणजेच ‘फिटनेस सर्टिफिकेट’ (Fitness Certificate) अनिवार्य करण्याचा निर्णय घेतला आहे.
ऑर्डरपासून ते आगमनापर्यंत बीएमसीची नजर
जड आणि वजनदार गणेशमूर्तींच्या सुरक्षेसाठी बीएमसीने विशेष कार्यप्रणाली तयार केली आहे. नवीन नियमांनुसार, गणेश मंडळांनी मूर्तीची ऑर्डर दिल्यापासून ती तयार होऊन मंडपात पोहचेपर्यंतची संपूर्ण नोंद पालिकेकडे ठेवली जाणार आहे. तसेच आगमन आणि विसर्जन मार्गावर बीएमसीचे विशेष पथक देखरेख ठेवणार आहे. यासंदर्भात सर्वसमावेशक नियमावली (SOP) तयार करण्यासाठी अतिरिक्त महापालिका आयुक्त (झोन २) प्रशांत सपकाळे यांच्या अध्यक्षतेखाली महत्त्वाची बैठक पार पडली, ज्यामध्ये या सुरक्षा नियमांना अंतिम रूप देण्यात आले.
आगमन आणि विसर्जन रस्ते तातडीने खड्डेमुक्त करण्याचे निर्देश
गणेशोत्सवादरम्यान मिरवणुकीत कोणताही अडथळा येऊ नये यासाठी बीएमसीचे अतिरिक्त आयुक्त अभिजित बांगर यांनी कडक पावले उचलली आहेत. आगमन आणि विसर्जनाच्या सर्व प्रमुख मार्गांवरील रस्ते तातडीने खड्डेमुक्त करण्याचे स्पष्ट निर्देश त्यांनी रस्ते विभाग आणि सर्व प्रभाग (वॉर्ड) अधिकाऱ्यांना दिले आहेत.
भुलेश्वर दुर्घटनेनंतर प्रशासनाची कठोर कारवाई
शनिवारी, २२ ऑगस्ट रोजी मुंबईतील ‘भुलेश्वर राजा’ गणेश मंडळाच्या आगमन मिरवणुकीत २२ फुटांची गणेशमूर्ती कोसळून दोन जणांचा दुर्दैवी मृत्यू झाला होता. या दुर्घटनेनंतर मुंबईतील सार्वजनिक गणेशोत्सव मंडळांमध्ये सुरक्षिततेचा प्रश्न ऐरणीवर आला आहे. बीएमसीच्या या नवीन फिटनेस प्रमाणपत्राच्या नियमांमुळे यंदाचा गणेशोत्सव अधिक सुरक्षित आणि शिस्तबद्ध पार पडेल, अशी अपेक्षा व्यक्त केली जात आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
11:55 26-08-2026
