मंडणगड शहरातील शिगवण धाब्यावरील अपघात; डोक्याला गंभीर दुखापत झाल्याने महिनाभरापासून सुरू होते उपचार
*मंडणगड (रत्नागिरी):* मंडणगड येथे हॉटेलमध्ये काम करताना जिन्यावरून पाय घसरून पडल्याने डोक्याला गंभीर दुखापत झालेल्या एका आचाऱ्याचा मुंबईतील के. ई. एम. रुग्णालयात उपचारादरम्यान मृत्यू झाला आहे. राजेश बबन तांबे (वय ४५, रा. वलोटे, ता. मंडणगड, जि. रत्नागिरी) असे मृत कर्मचाऱ्याचे नाव असून या प्रकरणी मंडणगड पोलीस ठाण्यात अकस्मात मृत्यूची नोंद करण्यात आली आहे.
घटनास्थळावरील घडामोडी आणि अपघात मिळालेल्या माहितीनुसार, राजेश तांबे हे गेल्या चार वर्षांपासून मंडणगड येथील शिगवण धाब्यावर आचारी म्हणून कार्यरत होते. १ सप्टेंबर रोजी दुपारी ३ वाजण्याच्या सुमारास हॉटेलमध्ये काम करत असताना शिडीवरून पाय घसरल्याने ते खाली पडले. या अपघातात त्यांच्या डोक्याच्या मागील बाजूस गंभीर दुखापत होऊन ते जागीच बेशुद्ध झाले.
वैद्यकीय उपचार आणि शस्त्रक्रिया अपघातानंतर हॉटेल मालक वल्लभ शिगवण यांनी तांबे यांना तातडीने उपचारासाठी प्रथमतः डेरवण येथील रुग्णालयात दाखल केले. तेथे करण्यात आलेल्या सीटी स्कॅन तपासणीमध्ये तांबे यांच्या डोक्यात रक्ताच्या गाठी झाल्याचे आढळून आल्याने डॉक्टरांनी तत्काळ शस्त्रक्रियेचा सल्ला दिला. त्यानुसार २ सप्टेंबर रोजी सकाळी ६.२३ वाजता त्यांना पुढील उपचारासाठी मुंबईतील के. ई. एम. रुग्णालयात हलवण्यात आले. तेथे डॉक्टरांनी त्यांच्या डोक्यावर शस्त्रक्रिया केली.
उपचारादरम्यान मृत्यू आणि पोलीस नोंद मुंबईतील के. ई. एम. रुग्णालयात महिनाभर उपचार सुरू असतानाच, ३ ऑक्टोबर रोजी सकाळी ११.२५ वाजता डॉक्टरांनी राजेश तांबे यांना मृत घोषित केले. या दुर्दैवी घटनेप्रकरणी ३ ऑक्टोबर रोजी दुपारी ३.४३ वाजता मंडणगड पोलीस ठाण्यात अकस्मात मृत्यू क्रमांक १७/२०२६, भारतीय नागरिक सुरक्षा संहिता (बीएनएसएस) कलम १९४ अन्वये अधिकृत नोंद करण्यात आली आहे.
