भजने, दशावतार आणि महाप्रसादाची रेलचेल
राजापूर :
श्री महालक्ष्मी नवरात्रोत्सव राजापूर तालुक्यातील केळवली येथे येत्या ११ ते २० ऑक्टोबर या कालावधीत मोठ्या उत्साहात साजरा होणार असून, या निमित्ताने विविध धार्मिक आणि सांस्कृतिक कार्यक्रमांचे आयोजन करण्यात आले आहे. ११ ऑक्टोबर रोजी घटस्थापनेने या उत्सवाची विधिवत सुरुवात होणार आहे. संपूर्ण उत्सव काळात परिसरातील भाविकांसाठी विविध कार्यक्रमांची मेजवानी तसेच महाप्रसादाची सोय करण्यात आली आहे.
श्री महालक्ष्मी नवरात्रोत्सव कालावधीतील धार्मिक व सांस्कृतिक कार्यक्रम
उत्सवाच्या काळात विविध दिवशी सामूहिक मंत्रपठण, भजन, कीर्तन, दिंडी भजन, सुस्वर भजने, कुमारी मुलींचे पूजन, समयी नृत्य आणि डबलबारी भजनाचे कार्यक्रम पार पडणार आहेत. याशिवाय, १७ ऑक्टोबर रोजी ७० वर्षांवरील ज्येष्ठ नागरिकांचा विशेष सत्कार करण्यात येणार असून, १८ ऑक्टोबर रोजी सप्तशती ग्रंथ पठण व होमहवन आयोजित करण्यात आले आहे. त्याच रात्री खानोलकर खानोली पारंपारिक नाट्य मंडळातर्फे दशावतार नाटकाचा महान पौराणिक नाट्यप्रयोग सादर केला जाणार आहे.
विविध गावांतील भजनी मंडळांचा सहभाग आणि महाप्रसाद व्यवस्था
या उत्सवादरम्यान केळवली परिसरासह आखवणे, वारगाव, नांदगाव आणि वाघाचीवाडी आदी ठिकाणच्या भजनी मंडळांचा सहभाग असणार आहे. या सादरीकरणामुळे संपूर्ण परिसरात भक्तिमय वातावरण निर्माण होणार असून डबलबारीचा कार्यक्रम भाविकांसाठी विशेष आकर्षण ठरेल. २० ऑक्टोबर रोजी विजयादशमी म्हणजेच दसऱ्यानिमित्त विसर्जन कार्यक्रम पार पडेल. उत्सवाच्या सर्व दिवसांमध्ये भाविकांसाठी सकाळी चहा व नाश्ता, दुपारी महाप्रसाद, सायंकाळी चहा आणि रात्रीचा महाप्रसाद अशी दिनचर्या व व्यवस्था करण्यात आली आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
01:52 08-10-2026
