कोकणातील ३७ ठिकाणी गाळ काढण्याचे काम; तिवरे दरडग्रस्तांसाठी उभारली २२ घरे, आमदार शेखर निकम व पालकमंत्री डॉ. उदय सामंत यांच्याकडून भावपूर्ण आठवणींना उजाळा
Chiplun Flood Relief मोहिमेत चिपळूणच्या पूरमुक्तीसाठी प्रसिद्ध अभिनेते आणि ‘नाम’ फाउंडेशनचे सर्वेसर्वा नाना पाटेकर यांनी केलेले योगदान संपूर्ण कोकणासाठी अत्यंत महत्त्वाचे व अविस्मरणीय ठरले आहे. चिपळूणसह संपूर्ण कोकणात सुमारे ४० ठिकाणी लोकसहभागातून नद्यांच्या पुनरुज्जीवनाचे काम त्यांनी हाती घेतले. या लोकसहभागातून झालेल्या कामांमुळे चिपळूणच्या पुराची तीव्रता लक्षणीयरीत्या कमी झाली. याशिवाय राजापूर, माखजन व अन्य ठिकाणीही गाळ काढण्याच्या कामात मोठे यश आले. तिवरे ग्रामस्थांसाठी तब्बल २२ घरे ‘नाम’च्या माध्यमातून उभारून पूरग्रस्तांना पुनर्वसित करण्यात आले.
चिपळूण आणि नाना पाटेकर यांचे एक अतूट नाते निर्माण झाले होते. चिपळूण पूरमुक्तीसाठी नानांनी प्रत्यक्ष पुढाकार घेऊन विविध उपाययोजना राबवल्या. जलसंपदा विभागाच्या सहकार्याने वाशिष्ठी व शिव नदीच्या पात्रातील गाळ काढण्याचे मोठे काम हाती घेण्यात आले, ज्यामुळे चिपळूणवासीयांना महापुराच्या संकटातून मोठा दिलासा मिळाला. २०२१ च्या महापुरानंतर नानांनी स्वतः महिनाभर चिपळूणमध्ये राहून मदतकार्याचे नियोजन केले होते. केवळ चिपळूणच नव्हे तर रत्नागिरी, सिंधुदुर्ग जिल्ह्यातील ३७ ठिकाणी गाळ काढण्याचे काम ‘नाम’ फाउंडेशनतर्फे करण्यात आले.
नाना पाटेकर यांच्या निधनानंतर प्रतिक्रिया देताना चिपळूण-संगमेश्वरचे आमदार शेखर निकम यांनी तीव्र शोक व्यक्त केला. “मराठी व हिंदी चित्रपटसृष्टीतील या महान अभिनेत्याने कोकणात सामाजिक कार्याचा वेगळा ठसा उमटवला. चिपळूणच्या पूरमुक्तीचा ध्यास त्यांनी घेतला होता, त्यामुळे पूरमुक्तीचा दुवा निखळल्याचे दुःख आहे,” अशा शब्दांत आमदार निकम यांनी आपल्या भावना व्यक्त केल्या.
उद्योगमंत्री तथा रत्नागिरी जिल्ह्याचे पालकमंत्री डॉ. उदय सामंत यांनीही नाना पाटेकर यांच्या निधनाबद्दल शोक व्यक्त करत त्यांच्या आठवणींना उजाळा दिला. “नानांचे जाणे मनाला चटका लावून गेले आहे. ते केवळ एक उत्तम अभिनेते नव्हे, तर संवेदनशील माणूस आणि सामाजिक कार्यकर्ते होते. ‘नाम’ फाउंडेशनच्या माध्यमातून त्यांनी शेतकरी, दुष्काळग्रस्त आणि पूरग्रस्तांसाठी केलेले कार्य पुढील अनेक पिढ्यांना प्रेरणा देत राहील,” असे उद्गार डॉ. उदय सामंत यांनी काढले.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
12:32 09-10-2026
