पुण्यातील वैकुंठभाई मेहता इन्स्टिट्यूटमधील आंतरराष्ट्रीय परिषदेत आंतरराष्ट्रीय प्रतिनिधींसमोर मांडली मते; पॅक्स सोसायट्या ग्रामीण अर्थकारणाचा कणा असल्याचे केले स्पष्ट
रत्नगिरी / पुणे:
Deepak Patwardhan Sahakar Parishad च्या संदर्भात आयोजित आंतरराष्ट्रीय परिषदेत, प्राथमिक कृषी संस्थांच्या (PACS) व्यावसायिक विकासासाठी योजना या विषयावर बोलताना, सहकारी संस्था या केवळ वित्त पुरवठादार नाहीत तर त्यांचा बहुआयामी सहभाग सुनिश्चित केला पाहिजे, असे ठाम प्रतिपादन ज्येष्ठ सहकारतज्ज्ञ दीपक पटवर्धन यांनी केले. पुण्यातील वैकुंठभाई मेहता इन्स्टिट्यूटमधील आंतरराष्ट्रीय केंद्रात नेपाळ, म्यानमार, बांगलादेश, झांबिया, गांबिया आणि भारत या देशांतील निमंत्रित प्रतिनिधींसमोर ते बोलत होते.
पॅक्स ग्रामीण अर्थकारणाचा कणा आणि बदलांचा स्वीकार
सहकारी प्राथमिक संस्था या आजही ग्रामीण अर्थकारणाचा खऱ्या अर्थाने कणा आहेत, यावर भर देत दीपक पटवर्धन म्हणाले की, बदलत्या जगामध्ये केवळ जुन्या शैलीत काम न करता बहुआयामी काम प्राथमिक कृषी संस्थांनी केले पाहिजे. बदलणारे तंत्रज्ञान, बदलती बाजारपेठ, प्रचंड स्पर्धा आणि बदलते वातावरण अशा अनेक आव्हानात्मक बदलांना सामावून घेत सहकारी संस्थांनी मार्गक्रमण करायला हवे; यातच सहकारी संस्थांची खरी यशोगाथा दडलेली आहे, असे परखड मत त्यांनी व्यक्त केले.
स्वरूपानंद पतसंस्थेची यशोगाथा आणि पश्चिम महाराष्ट्राचा दाखला
भाषण दरम्यान पटवर्धन यांनी पश्चिम महाराष्ट्रातील ‘अंब्रेला टाईप’ सहकार विकास आणि त्यातून वाढलेली अर्थकारणाची गती व त्या भागातील विकास या विषयावर अनेक संदर्भ दिले. तेथील पॅक्स सोसायट्यांची यशोगाथा वर्णन करतानाच, त्यांनी श्री स्वामी स्वरूपानंद पतसंस्थेने केलेली भरीव भांडवल निर्मिती आणि ६३% वरून थेट ०% एनपीए (NPA) करताना केलेले यशस्वी प्रयत्न या प्रवासाचा सविस्तर ऊहापोह केला.
‘सहकारातून समृद्धी’ दृष्टिकोन आणि ३५ वर्षांच्या प्रवासाची पावती
पंतप्रधानांनी दिलेला ‘सहकारातून समृद्धी’ हा दृष्टिकोन वास्तवात आणण्यासाठी युवा वर्गाचा सहभाग आणि सहकारी संस्थांनी स्वतःत करावयाचे तातडीचे बदल यावरही त्यांनी विविध उदाहरणे देत भाष्य केले.
आपली प्रतिक्रिया व्यक्त करताना दीपक पटवर्धन म्हणाले, “आंतरराष्ट्रीय आयोजनात वक्ता म्हणून सहकारी संस्थांची यशोगाथा मांडताना खूप आनंद झाला. उपस्थितांच्या शंकांचे निरसन करता आल्याने मोठे समाधान मिळाले. या आंतरराष्ट्रीय मंचावर मिळालेली संधी ही माझ्या ३५ वर्षांच्या प्रदीर्घ व यशस्वी सहकार वाटचालीची पावती आहे.”
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
10:17 10-10-2026
