रत्नागिरी ग्रामीण पोलिसांत आकस्मिक मृत्यूची नोंद; मृत व्यक्तीची ओळख पटवण्याचे पोलिसांचे प्रयत्न सुरू
रत्नागिरी :
तालुक्यातील हातखंबा गावातील सांबर टाके परिसरात एका मोकळ्या कातळ जमिनीवर अंदाजे ५० वर्षे वयाच्या अनोळखी पुरुषाचा मृतदेह आढळून आला आहे. ही घटना १२ ऑक्टोबर रोजी दुपारी १२ वाजण्याच्या सुमारास उघडकीस आली. या घटनेची माहिती मिळताच स्थानिक प्रशासकीय व पोलिस यंत्रणेने तत्काळ घटनास्थळी धाव घेत प्राथमिक सोपस्कार पार पाडले असून, मृत व्यक्तीची ओळख पटवण्याचे आव्हान पोलिसांसमोर आहे.
प्रकाश गुरव यांच्या मालकीच्या जागेत आढळला मृतदेह
मिळालेल्या माहितीनुसार, हातखंबा येथील सांबर टाके भागात प्रकाश गुरव यांच्या मालकीची मोकळी कातळ जमीन आहे. या जागेत एक पुरुष मृतावस्थेत पडलेला स्थानिक नागरिकांच्या निदर्शनास आला. मृत व्यक्तीचे नाव, पत्ता किंवा मूळ गाव याबाबत कोणतीही माहिती उपलब्ध होऊ शकलेली नाही. पोलिसांकडून आसपासच्या परिसरात तसेच लगतच्या गावांमध्ये चौकशी करून मृत व्यक्तीची ओळख पटवण्याचे काम प्राधान्याने हाती घेण्यात आले आहे.
भारतीय नागरिक सुरक्षा संहितेनुसार गुन्हा दाखल
या प्रकरणा गांभीर्य लक्षात घेऊन रत्नागिरी ग्रामीण पोलीस ठाण्यात भारतीय नागरिक सुरक्षा संहितेच्या (BNSS) कलम १९४ अन्वये आकस्मिक मृत्यूची नोंद करण्यात आली आहे. घटनेची माहिती मिळताच पोलिसांनी घटनास्थळाचा पंचनामा करून मृतदेह उत्तरीय तपासणीसाठी (पोस्टमार्टमन) पाठवला आहे.
मृत्यूचे कारण अद्याप अस्पष्ट
सध्या तरी या मृत्यूचे नेमके कारण स्पष्ट होऊ शकलेले नाही. वैद्यकीय अहवाल आल्यानंतर आणि पोलिसांच्या पुढील तपासादरम्यान या प्रकरणी अधिक माहिती समोर येण्याची शक्यता वर्तवली जात आहे. रत्नागिरी ग्रामीण पोलिस या प्रकरणाचा अधिक तपास करत असून, कोणाला या व्यक्तीबाबत काही माहिती असल्यास त्यांनी तत्काळ पोलिसांशी संपर्क साधावा, असे आवाहन करण्यात येत आहे.
